Завршена инсталацијата на системот за компримиран воздух на Клинички центар

Заврши инсталацијата на новата компресорска станица и системот за компримиран воздух на Клинички центар „Мајка Тереза“ во Скопје.

Министерството за здравство информира дека во рамки на проектот, биле монтирале три компресори и друга потребна опрема, како и цевен развод и приклучни места за снабдување на оперативни сали.

Исто така, извршена е замена и монтажа на бакарен цевен развод, приклучни места; разводни ормани за компримиран воздух за снабдување на оперативниот блок од 12 сали и 2 сали на Клиниката за пластична хирургија, согласно европската фармакопеја, изработена согласно европската директива 93/42/EEC.

Во моментот се изведува пробна работа на системот, а по нејзиното завршување, ќе се одреди термин за прекин на снабдувањето со компримиран воздух и поврзување со останатите корисници во комплексот.

Во тек е пробна работа на системот за компримиран воздух на комплекс клиники „Мајка Тереза“ -Скопје. По завршување на пробната работа, Министерството за здравство ќе одреди термин за целосен прекин на снабдувањето со компримиран воздух на сите клиники во болничкиот комплекс, за поврзување со останатите корисници.

По спроведување на овие активности, системот за компримиран воздух ќе биде ставен во целосна функција, стои во соопштението од Министерството за здравство.

Поради мирис кој се ширеше во дел од хируршките сами, подолго време беа одложувани операции, а пациентите беа препраќани во другите хируршки центри во Скопје и по другите градови.

Потоа за да бидат ставени во функција беа поставени надворешни компресори, кои се користеа како преодно решение до поставувањето на новиот компресорски систем.

За случајот беше покрената и истрага, а примероци за испитување беа испратени во Германија.