Академски пленум на Србија: Инфлацијата во значително повисока отколку во еврозоната, граѓаните сѐ повеќе сиромашни

На крајот од 2025 година, годишната инфлација во Србија е околу 3%, што е во рамките на целната инфлација на Народната банка на Србија, но е далеку повисока отколку во еврозоната, каде што е забележана инфлација од околу 2%.

Особено загрижувачки е фактот што цените на основните услуги и стоки (енергија, храна, комунални услуги) растат побрзо од платите, особено кога се зема предвид цената на електричната енергија, преносот и дистрибуцијата на енергија, која се зголеми за 6,6% во 2025 година, а нивното ново зголемување на цените е најавено во 2026 година, истакнуваат од Академскиот пленум на Србија.

Од друга страна, зголемувањето на цената на електричната енергија не влијае само на сметката што граѓаните ја плаќаат на Електро привреда Србије (ЕПС), туку ги зголемува и трошоците за производство, а со тоа и цената на сите основни прехранбени производи, како и транспортот и услугите. Затоа, не е изненадувачки што граѓаните имаат впечаток дека работат се повеќе и повеќе, но живеат исто или полошо од порано – овој впечаток не е ирационален, туку е последица на лошата економска политика. Иако инфлацијата се чини дека е под контрола, таа не влијае на луксузот, туку на основните трошоци за живот, што за голем број граѓани е единствениот трошок – тие можат само да сонуваат за луксуз. Така, според најновите официјално достапни податоци од Министерството за внатрешна и надворешна трговија, во првите осум месеци од 2025 година, цената на белиот леб се зголемила за 5,7%, на говедското месо (без коски) за 16,7%, на свинското за 16,4%, на маслото за 8,4%, а на млечното чоколадо за 17,7%, што е далеку над вкупната стапка на инфлација.

Академскиот пленум со голема загриженост го забележува падот на животниот стандард на српските граѓани во 2025 година, како и очекуваното континуирано слабеење на куповната моќ на граѓаните во 2026 година, бидејќи зголемувањето на платите не може да биде придружено со зголемување на основните трошоци за живот. Затоа, Академскиот пленум го повикува претседателот на Србија веднаш да распише предвремени парламентарни избори, со цел да се запре понатамошното осиромашување на граѓаните со нова економска политика и да се зголеми нивниот животен стандард.