Белград со билборди со честитки за роденденот на Лукашенко

Денес, во главниот град на Србија, Белград, и во вториот по големина град Нови Сад, осамнаа со билборди со честитки за роденденот на белорускиот диктатор Александар Лукашенко.

Тие се поставени од провладиното Конзервативно движење Наши. На билбордите пишува: „Среќен роденден, претседателе Лукашенко — Србија те сака“. Ова е израз на пријателството и поддршката на српскиот народ за братска Белорусија и нејзиниот претседател, се вели на веб-страницата Наши. Според движењето, со текот на годините Лукашенко се докажа како „искреен и голем пријател на српскиот народ“. „Во најтешките моменти за Србија, Белорусија отсекогаш била покрај нас, а претседателот Лукашенко јасно покажа со својот став и постапки дека ја гледа Србија како братска земја“, се вели и на веб-страницата.

Лидерот на движењето, Иван Ивановиќ, кој е чест гостин во провладините медиуми во Србија, вели дека со овој гест сакале да ја нагласат важноста на традиционалните врски меѓу Србија и Белорусија. „Нашиот народ добро разбира што значи да се бориш за слобода и независност и затоа гордо велиме: Среќен роденден, претседателе Лукашенко — Србија те сака!“

На прашањето како ги финансираат овие билборди, со оглед на тоа што се вонпарламентарно движење, претседателот на Наши одговори дека нивните активности со години ги финансираат нивните симпатизери. „Навистина има голем број русофили во Србија кои се подготвени да помогнат во многу активности поврзани со Русија и Белорусија“, додаде Ивановиќ.

„Наши“, кое се декларира како десничарско движење, претходно му го честиташе роденденот на рускиот претседател Владимир Путин во 2022 година со слични билборди.