Бугарија ги ограничува автоматите за лекови по алармите за злоупотреба на парацетамол кај малолетници

Министерството за здравство во Софија предлага остри ограничувања на продажбата на лекови преку автомати, откако неколкумина тинејџери завршија во болница по предозирање со парацетамол. Иако властите ја поврзаа појавата со наводен „Paracetamol Challenge“ на TikTok – тренд што не е потврден од платформата, ниту од европските медиуми – ресорот предупреди дека прекумерната употреба на аналгетици може да биде смртоносна.

Според нацртот, во автоматите ќе останат само препарати со „докажано безбедни дози за самостојна употреба“. Пакувањата на парацетамол ќе се скратат на најмногу 12 таблети од 500 mg, ибупрофенот на 10 таблети од 200 mg, а лекови како кетопрофен и повеќето комбинирани аналгетици целосно ќе исчезнат од автоматската продажба. Апаратите ќе мора видливо да предупредуваат дека лековите се наменети за употреба до три дена и дека при упорни симптоми е неопходна лекарска консултација.

Фармацевтската унија ја поздрави мерката како баланс меѓу слободниот пристап и јавната безбедност. „Кој е решен да направи нешто опасно, ќе најде начин, но наша должност е да го намалиме ризикот од случајно предозирање и да ги предупредиме децата“, изјави претседателот Димитар Маринов. Унијата смета дека државата, наместо да проширува автоматска продажба, треба да субвенционира нови аптеки во малите градови и села, каде фармацевтски услуги речиси и да нема.

Предлогот веќе е испратен во парламентот и би можел да стапи во сила до крајот на летото, доколку добие зелено светло од пратениците.