Skip to content
Бившиот грчки премиер Алексис Ципрас ја обвини конзервативната влада на Нова демократија дека ги продлабочува социјалните нееднаквости и ја охрабрува корупцијата, повикувајќи ја разединетата централно-лева опозиција да се собере околу нова политичка визија.
Говорејќи на настан за демократија и социјална правда што Институтот „Алексис Ципрас“ го одржа во атинскиот Концертен центар „Мегарон“, 50-годишниот пратеник на СИРИЗА ја обвини владата за вмешаност во скандал со прислушување, како и за последни неправилности со земјоделски субвенции. Исто така, тврди дека извршната власт се обидува да ги прикрие своите одговорности за смртоносната железничка несреќа кај Темпи и бродоломот со мигранти кај Пилос.
„Потребна е морална, општествена и политичка иницијатива што ќе ги обедини сите прогресивни сили, ќе допре до разочараните од системот, ќе ја спречи крајнодесничарската демагогија и ќе ги натера граѓаните да станат од каучот“, порача Ципрас, распламтувајќи шпекулации за евентуално политичко враќање.
Тој дури осум пати го спомена терминот „патриотизам“, повикувајќи левицата повторно да го присвои поимот. „Нов патриотизам против олигархијата и клептократијата… нов патриотизам во Грција што ќе се поврзе со слични движења во Европа, САД и пошироко“, истакна тој. „Нема магичен клуч за поинаква Грција, но тоа е цел за која вреди да ги вложиме нашите сили.“
Публиката скандираше „Ако не сега, кога?“ и „Врати се“ пред Ципрас да се појави на сцената. Настанот го проследија шефот на собранискиот клуб на СИРИЗА, Сократис Фамелос, пратеници на партијата и членови на отцепената Нова левица.
Ципрас се повлече од лидерската позиција во јуни 2023 година, четири дена по тешкиот изборен пораз на СИРИЗА. Оттогаш партијата се обидува повторно да добие политички замав.