Skip to content
Административниот гувернер на државата Атос, Алкивијадис Стефанис, го покани американскиот претседател Доналд Трамп да ја посети Света Гора.
„Му реков на заменик-државниот секретар на САД да му ја пренесе официјалната покана од Света Гора на претседателот Трамп. Очите му се раширија, но мислам дека беше воодушевен и рече: „Секако, ќе го направам тоа“, изјави Стефанис за радиото Параполитика 90.1, а го пренесе како вест Ортодокс Тајмс.
„Имајќи го предвид односот што претседателот Трамп го изгради со Православната црква – преку посетата на Неговата Светост Вселенскиот патријарх, преку начинот на кој патријархот ја пренесе пораката за Халкиското теолошко училиште, која Трамп веднаш му ја препрати на претседателот Ердоган, и преку неговата средба со архиепископот Елпидофорос, верувам дека тој ја разбира важноста на Света Гора. Убеден сум дека кога ќе ја посети Грција, ќе сака да ја посети и монашката држава.“
Во врска со неодамнешната посета на заменик-државниот секретар на САД, Мајкл Ригас, на Света Гора, Стефанис изјави следново: „Ова е млад човек со визија за иднината на Соединетите Американски Држави. Бев многу задоволен кога открив дека има длабока љубов кон Света Гора, кон Грција и кон верата. Тој е многу религиозен човек, ова беше негова трета посета на Света Гора, иако прва на неговата сегашна позиција. Тој има длабоко познавање на животот на Света Гора, а неговиот пристап не е само пристап на верник-аџија, туку на државен службеник кој ја разбира улогата на Света Гора во рамките на религиозната дипломатија, и ова особено ме израдува.“
