Skip to content
Германската министерка за Европа и климатски прашања Ана Лирман се огласи на Инстаграм откако Владата на Република Српска ја прогласи за персона нон грата.
„Денес бев во Бања Лука, во Босна и Херцеговина. Тоа е убав град со одлични луѓе. Луѓето што ги запознав таму топло ме прифатија. Имав голем број одлични средби со граѓанското општество и опозицијата. Сецесионистичките активности на Додик се неприфатливи. Кон крајот на мојата програма во Бања Лука, Додик повторно го покажа својот деструктивен пристап. Неговите претставници ни се закануваа на мене и на мојата делегација со насилство. Ова е знак на слабост. Додик е се поизолиран и нема поддршка од граѓаните на Република Српска. Добив многу пораки за поддршка од Бања Лука – луѓето се срамат од постапките на Додик. Јасно им порачувам на сите луѓе во Република Српска: Ние ќе продолжиме да бидеме со вас – на вашиот пат кон просперитет, кон стабилност и кон Европската унија“, рече Лирман.
Откако беше прогласена за персона нон грата, Лирман ја откажа средбата што требаше да ја има во Бања Лука со лидерите на опозициските партии.
Во образложението на Владата на РС се наведува дека одлуката ја донеле како „реципрочна мерка“ откако Германија, заедно со Австрија, вчера го забраниле влезот на лидерот на босанските Срби Милорад Додик, премиерот на ентитетот Радован Вишковиќ и претседателот на Националното собрание Ненад Стевандиќ поради загрозување на спроведувањето на Дејтонскиот договор.
„Владата на РС ја прогласува Ана Лирман за персона нон грата во Република Српска и му наредува на Министерството за внатрешни работи да го изведе тоа лице надвор од границите на (ентитетот) по влегувањето на територијата на Република Српска“, се вели во соопштението во кое германската министерка е прогласена за непожелна.
Додик, ја навреди германската министерка, велејќи и дека е „глупава“.
„Не ми се верува дека е толку наивна што после сите лаги и навреди што ги изрече, само за да ја задоволи сараевската чаршија, очекуваше немо да ги набљудуваме нејзините постапки околу РС. Во дилема сум дали е нејзиниот ум или се раководела од умот на опозицијата. И двете се глупави“, напиша Додик во објавата на мрежата X.
