Кос: Црна Гора е колку една третина од Виена, лесно ќе ја интегрираме во ЕУ

Комесарот за проширување на ЕУ, Марта Кос, на Форумот за проширување во Брисел изјави дека Европската Унија е целосно способна да ја прифати Црна Гора дури и без големи внатрешни реформи во самата Унија. Таа нагласи дека црногорската држава е мала – „една третина од големината на Виена, големината на Тулуз или Штутгарт“ – и нејзината интеграција нема да претставува тешкотија за ЕУ. Кос потсети дека во 2004 година, 70 милиони луѓе се приклучиле на Унијата и „Европа успеала да ги интегрира“.

Сепак, таа предупреди дека нема да има „кратки патишта“ во процесот на пристапување и дека ЕУ „нема да затвора очи пред ништо“ во однос на стандардите и реформите. Според неа, Брисел мора да ги поддржи најнапредните кандидати, меѓу кои Црна Гора традиционално се смета за лидер.

Црногорскиот премиер Милојко Спајиќ го опиша моментот како идеален за проширување на ЕУ. Тој рече, цитиран од телевизијата Н1, дека Подгорица е „многу задоволна“ од забрзувањето на европскиот процес и има намера да го искористи максимално. Спајиќ увери дека брзината нема да биде на штета на квалитетот на реформите: „Сакаме да ги затвориме сите поглавја од преговорите во рекордно време, но ова нема да биде преседан – и другите сегашни земји-членки го направија тоа“.