Skip to content
Едно лице го загуби животот, а друго е со тешки телесни повреди во тешка сообраќајна несреќа што се случила денеска во раните утрински часови на делницата помеѓу клучката Жедничка и наплатната станица кај Суботица, во насока кон граничниот премин Хоргош.
Според првичните информации од Полициската управа во Суботица, патничко возило марка „КИА“ со македонски регистарски таблички излетало од коловозот во близина на населбата Вишњевац и се превртело. Во ударот на самото место починал 39-годишниот сопатник Н. А., додека 60-годишниот возач А. А. е хоспитализиран со тешки повреди во Општата болница во Суботица.
На терен веднаш интервенирале екипи на сообраќајната полиција, противпожарната единица и итната медицинска служба. Дежурен обвинител од Основното јавно обвинителство во Суботица извршил увид, при што се обезбедени материјални траги и е наредена обдукција за точно утврдување на причините за несреќата.
Полициските службеници најавија поднесување кривична пријава против возачот за „тешки дела против безбедноста на јавниот превоз“, додека трае истрагата која треба да утврди дали брзината, состојбата на патот или можен човечки фактор придонеле кон трагичниот исход.
Сообраќајот на автопатот Нови Сад – Суботица во меѓувреме е нормализиран, а надлежните апелираат до возачите да ги почитуваат пропишаните ограничувања и да ја приспособат брзината на условите на патот.
