Министерка во владата на Вучиќ ги повика Србите во Германија да гласаат за екстремно десничарската АфД

Министерката за семејна грижа и демографија и претседателката на српската партија Заветници, Милица Ѓурѓевиќ Стаменковски, на завршната конвенција на партијата Алтернатива за Германија (АфД) ги повика Србите во Германија да ја поддржат АфД на изборите и порача дека верува дека ќе дојде време кога целиот свет ќе се потсети дека Косово било, е и ќе остане Србија.

„Им благодарам на АФД за иницијативата Германија да го повлече признавањето на независноста на таканареченото Косово. Србите нема да го заборават тоа“, нагласи Ѓурѓевиќ, додавајќи дека Србите на Косово и Метохија се најзагрозената етничка група во цела Европа.

Таа нагласи и дека Србите веруваат во правдата и вистината, во победата на меѓународното јавно право.

„Веруваме дека ќе дојде време кога целиот свет ќе се потсети дека Косово било, е и ќе остане Србија“, нагласи Ѓурѓевиќ Стаменковски.

Таа изјави дека поканата за обраќање на митингот на АФД, заедно со претставници на Слободарската партија на Австрија, е уште една потврда дека Српската партија Заветници припаѓа на семејството на националните суверенисти.

Ѓурѓевиќ посочи дека по долгогодишно негирање, клевети, обвинувања и системски саботажи на европските суверени, дојде нивното време, оценувајќи дека на граѓаните им е доста од глобалните елити и од политиките што ги спроведувале.

„Европа не може да остане само сведок на овие промени, туку мора да биде актер и двигател на нејзината иднина“, рече Ѓурѓевиќ.

Според неа, враќањето на слободата на говорот, враќањето на културните и семејните вредности, борбата против криминалот и насилството на улиците и границите, отпорот кон привилегираната бриселска бирократија се предизвици со кои денес се соочуваат повеќето европски земји.

Затоа, како што вели, Германија денес мора да биде локомотива на суштински и радикални промени, кои во визијата на АФД вклучуваат подобра комуникација меѓу Истокот и Западот, обновување на трговските и економските врски, воспоставување мир и стабилност, како и договор меѓу европските народи за заедничка иднина.

„Ние, Србите, од прва рака доживеавме што значи пропаганда, но никогаш не дозволивме знамето на слободата да ни падне од раце“, рече Ѓурѓевиќ, повикувајќи ги Србите во Германија да ја поддржат АфД на изборите во оваа земја.