Skip to content
Европската унија се заканува со контрамерки доколку САД воведат нови царини на европската стока
Можноста за воведување царини на американската соја може значително да ги зголеми цените на месото во Европа и на Балканот.
Според реномираниот германски весник Handelsblatt, сценариото во кое Брисел воведува царини на увозот на американска соја би можело да доведе до значителен раст на цените на месото на европскиот пазар, а со тоа и во регионот.
САД се главен снабдувач на соја во Европа, а особено во Германија – едно од најважните пазари на ЕУ. Сојата е клучна компонента во производството на сточна храна богата со протеини, неопходна за одгледување свињи, говеда и живина. Бидејќи ЕУ сама не произведува доволно соја, увозот од САД и Бразил е од витално значење.
Германската асоцијација на месната индустрија потврди за Handelsblatt дека воведувањето царини на американската соја неизбежно ќе ги зголеми трошоците за производство на месо. Најпрво тоа ќе ги погоди сточарите, но последиците брзо ќе ги почувствуваат и потрошувачите преку повисоки цени на месото и месните преработки.
„Во моментов е тешко да се процени колку би се зголемиле цените“, соопшти здружението. Сè уште не е познато какви би биле царините, ниту дали други земји би можеле да ја надоместат американската соја. Аналитичарите потсетуваат дека САД и Бразил заедно обезбедуваат над 90% од потребите на ЕУ за соја, а дополнителен проблем е отежнатиот увоз од Украина поради војната.
Потрошувачите на удар
„Царините и другите давачки речиси секогаш најмногу ги погодуваат крајните потрошувачи“, предупредува генералниот директор на германското здружение за трговија со храна, Филип Хенекерс. Во време кога Европа се соочува со економска неизвесност, дополнителните поскапувања на храната би можеле сериозно да ги погодат граѓаните.
Ова не е првпат сојата да биде „оружје“ во трговските судири меѓу Вашингтон и Брисел. За време на првиот мандат на Доналд Трамп, ЕУ, предводена од Жан-Клод Јункер, успеа да спречи поширок трговски конфликт преку ставање на сојата во центарот на преговорите. Како резултат, увозот на американска соја во ЕУ порасна за 133% во 2018 година, додека цената ѝ се намали за 25%.
ЕУ веќе подготвува први контрамерки како одговор на американските царини на челик и алуминиум, а на листата се најдоа вискито, тексас-облеката, моторите и путерот од кикирики. Сепак, се очекува дополнителни царини кои би можеле да ги опфатат и земјоделските производи, вклучително и сојата, да бидат воведени веќе во средината на април.
