Новата германска Влада можено е да го ограничи доаѓањето на работници од Западен Балкан во Германија

Германскиот медиум „Тагесцајтунг“ објави дека правилото за Западен Балкан, кое им овозможува на работници од неколку балкански земји да работат во Германија, може значително да се ограничи под новата влада.

Оваа регулатива, воведена во 2015 година, им овозможува на граѓани од Албанија, БиХ, Црна Гора, Северна Македонија и Србија да дојдат во Германија без потреба од формални квалификации, единствено со понуда за работа и одобрение од Федералната агенција за труд. Со тоа, се намали бројот на неосновани барања за азил и се обезбеди легален пристап до пазарот на трудот.

Во 2024 година, владата на Олаф Шолц не само што го продолжи ова правило, туку и ја зголеми квотата за работни визи од 25.000 на 50.000 годишно.

Се очекува идната германска влада, најверојатно предводена од ЦДУ на Фридрих Мерц, да направи значителни измени во имиграциската политика. Во коалициските преговори со ЦСУ и СПД, правилото за Западен Балкан не се споменува експлицитно, што отвора можност за негово ограничување. Прелиминарните документи сугерираат намалување на квотата на 25.000 работни визи годишно.

Што велат експертите?

Според Херберт Брикер од Институтот за истражување на пазарот на труд (ИАБ), укинувањето или ограничувањето на ова правило би било лоша одлука, бидејќи мигрантите од Западен Балкан се одлично интегрирани на германскиот пазар на трудот. Околу 95% од нив остануваат вработени три до четири години по доаѓањето, што ги прави една од најуспешните имигрантски групи.

Политикологот Холгер Колб, пак, смета дека квотите треба да се намалат и фокусот да биде на квалификациите, а не на потеклото на работниците. Тој укажува на постоечки програми за признавање на дипломите, кои можат да обезбедат подолгорочна интеграција на странските работници.

Последици од потенцијалното ограничување

Германија годишно губи околу 400.000 работници поради демографските промени. Доколку се намалат можностите за влез на работна сила од Западен Балкан, тоа може да предизвика недостиг во клучни сектори како градежништвото, угостителството и медицината. Компаниите предупредуваат дека ограничувањето на имиграцијата може да доведе до економски проблеми, намалување на даночните приходи и зголемување на дефицитот на работна сила.

Останува да се види дали новата влада ќе направи компромис или ќе преземе поостар став кон имиграцијата од Западен Балкан.