Пожарите во југоисточниот дел на Родос и во јужниот дел на Евија и понатаму се активни, а пожарникарите се борат за огнените јазици да останат подалеку од населени места, додека пак преку бројот за итни случаи 112 попладнево имаше нови превентивни евакуации, јави дописничката на МИА од Атина.
Двата грчки острови се пред уште една тешка ноќ со оглед на тоа што постојат континуирани разгорувања на активните жаришта, пожарите се уште не се под контрола, а по стемнувањето не интервенираат воздушните средства.
На Родос гори веќе седми ден, на Евија пожарот избувна вчера, додека пак и оној во северниот дел на Крф сѐ уште е активен.
Министерот за цивилна заштита и климатски кризи на Грција Василис Кикиљас во изјава за државната телевизија ЕРТ рече дека „веќе 12-ти ден под екстремни услови на топлотен бран и силен ветер без престан се бориме на десетици фронтови на шумските пожари“ и истакна дека противпожарната служба во овој период требала да се справи со над 500 пожари.
Дополнително соопшти дека се зголемуваат казните за подметнување пожар, но и двојно се зголемува персоналот во Дирекцијата за спречување на криминални дела- подметнување пожари.
Поради пожарите во Грција, вечерва во Атина се одржаа два протести, еден пред Парламентот, а другиот пред Министерството за цивилна заштита и климатски кризи.
