Проевропската опозицијата бара од ЕУ и од САД – вклучување во демократизацијата на Србија

Пратеничката група Обединети (ССП, ПСГ, ПзП, Слога) како и групата Зелено-левичарски клуб НДБ, кои технички ги организираат протестите „Србија против насилството“, испратија заедничко писмо до меѓународните актери во кое изразија барања европските институции дополнително да се вклучи во спроведувањето на препораките дадени за демократизација на Србија, јави дописникот на МИА од Белград.

Писмото е упатено до Генералниот директорат на Европската служба за надворешни работи, известувачот на Европскиот парламент за Србија Владимир Билчик, заменик-помошникот секретар во американскиот Стејт департмент Габриел Ескобар, амбасадорите на ЕУ и САД во Србија, како и шефовите на мисиите на ОБСЕ и Советот на Европа во Србија, Јан Брат и Тобијас Флесенкемпер.

– Се разбира, Србија е далеку од единствената земја која доживеала масовни убиства. Но, не треба да бегаме од фактот дека овие настани се случија во атмосфера на насилство и страв, во земја во која противниците на власта секојдневно се заплашуваат и навредуваат и каде секој што ќе се осмели да изрази критичко мислење за власта е етикетиран како завереник. Јазикот на навреди ги преплави медиумите, Собранието и воопшто јавниот простор, се наведува во писмото.

Како што е наведено во писмото, според извештајот на ЕУ за Србија, Србија е „длабоко поделена земја “,каде што претседателот, пред само две години, во ударниот термин на телевизијата опиша како кланот од подземјето, одговорен за повеќекратни убиства, жртвите ги претвори во „човечки ќебапи“, со презентација на грозоморни фотографии.

Населбата на училиштето во кое се случи масовното пукање, во центарот на Белград, е преполно со насликани мурали на загинати фудбалски навивачи и на Ратко Младиќ.

Во писмото во кое се наведуваат барањата од осумте протести, се потсетува дека за неколку дена по овие неописливи трагедии, граѓаните на главниот град на Србија излегоа на улиците отфрлајќи ја културата на насилство што ја преплави земјата за време на владеењето на актуелниот претседател и медиумите лојални на него.

Наместо да ја обедини земјата потресена од две трагедии, претседателот понуди да започне разговори со опозицијата, но и ја подгреваше поделеноста и ги таргетираше „непријателите“, а демонстрантите ги окарактеризира како „ѓубриња“ и „мршојадци“.

Партиите кои технички ги организираат протестите не ги отфрлаат изборите, но ќе имаат вистински легитимитет само доколку се израмнат условите за сите.

Со цел да се подобри правната сигурност и да се обезбедат еднакви можности за изборниот натпревар, за законодавството би била корисна понатамошната ревизија за справување со предизвиците поврзани со злоупотреба на административни ресурси и пристап до медиумите и елиминирање на преостанатите празнини и недоследности, многу пред следните избори и во рамките на инклузивно и транспарентен консултативен процес, се наведува како една од клучните препораки во писмото.

Според опозицијата, власта треба да воспостави и имплементира ефективни правни и институционални механизми за надзор, со цел да се спречи заплашување и притисок врз гласачите, вклучително и вработените во јавните и државните институции и компании.

Неопходно е да се зајакне и независноста на РЕМ и РТС треба веднаш да започне барем еден нов неделен формат на политичка дебата.

– Ги повикуваме сите горенаведени меѓународни институции кои ги поддржаа овие препораки да помогнат во нивното спроведување во овој клучен момент за земјата. Ги повикуваме да помогнат во воспоставувањето и олеснувањето на транспарентен процес за условите на претстојните избори. Без оваа помош и без процесот низ кој можеме да дојдеме до рамноправни услови и пофер политички натпревар, сегашната длабока политичка криза нема да се реши, а иднината на Србија ќе остане неизвесна, се наведува во писмото на проевропскта опозиција.