Skip to content
Според најновото издание на Форбсовата листа на милијардери за 2025 година, Албанија за првпат има свој претставник меѓу најбогатите луѓе во светот. Станува збор за Самир Мане, чие богатство е проценето на 1,4 милијарди долари.
„Албанија го има својот прв милијардер оваа година – Самир Мане, кој има изградено богатство од 1,4 милијарди долари од инвестиции во трговски центри, продавници за електроника и луксузни недвижности низ целиот Балкан”, пишува Форбс.
Тој се наоѓа на 2,356-то место на листата што брои вкупно 3,028 милијардери од целиот свет. Мане е основач и претседател на „BALFIN Group“, инвестициски конгломерат со седиште во Тирана, кој опфаќа широк спектар на бизниси, вклучувајќи трговски центри, ланци на продавници за електроника, играчки и мода, како и финансиски институции, недвижнини и инфраструктурни проекти во регионот.
Мане (58) побегнал од комунистичкиот режим во Албанија во 1991 година, преселувајќи се во Австрија како бегалец. Неговата бизнис кариера започнува во 1993 година, кога почнува да продава апарати за домаќинство во Албанија. Во 1998 година го основа ланецот „Нептун“, кој прераснува во водечки бренд за продажба на електроника во регионот. Во 2005 година, тој се враќа во Албанија и го отвора првиот трговски центар во земјата.
„BALFIN Group“ има свои инвестиции и надвор од Балканот. Компанијата поседува недвижен имот во САД, Канада и Австрија, како и логистички паркови и приватен универзитет во Албанија. Покрај тоа, групацијата е сопственик на значајни индустриски проекти, вклучително и рудници за хром во Албанија.
Во глобални рамки, САД остануваат земјата со најмногу милијардери – рекордни 902, додека Кина со 516 (вклучувајќи го и Хонг Конг) е на второто место. Индија, пак, има 205 милијардери, што ја задржува на третата позиција. Вкупно, 76 нации и две полуавтономни територии имаат барем еден милијардер, што покажува дека глобалното богатство е сѐ повеќе диверзифицирано.
