Синдикатите во Бугарија предлагаат нов данок на богатство за милионерите

Работниците во Бугарија придонесуваат со околу 70% од приходите во државниот буџет, додека компаниите учествуваат со само 30%. Ова го покажува последната анализа на Конфедерацијата на трудот „Подкрепа“, која се цитира од бугарските медиуми. Синдикатот го критикува несразмерното даночно оптоварување и укажува на фактот дека повеќе од 11% од вработените во Бугарија се сметаат за сиромашни работници.

Во потрагата по попправеден даночен систем, „Подкрепа“ предлага сериозни измени во даночната и осигурителната политика. Меѓу нив се наоѓаат и идеи за воведување на данок на богатство, како и за прогресивно оданочување на приходите на физичките лица. Една од клучните идеи е поделба на даночната скала на три нивоа, со повисока даночна стапка за доходите над одреден праг.

Предлогот вклучува задржување на сегашната стапка од 10% за приходите што се движат помеѓу просечната плата и максималниот приход од осигурување, додека за оние над овој праг, данокот би бил повисок. Во предлог-буџетот за следната година, се предвидува зголемување на максималниот приход од осигурување од 3.750 на 4.130 лева, но синдикатот инсистира дека овој плафон треба да се зголеми на 8.500 лева за да се исправи нерамнотежата во системот.

Една од најважните иницијативи е воведување на локален данок на богатство, кој ќе се однесува на физичките лица чие богатство надминува одреден праг. Според „Подкрепа“, оваа мерка ќе ја зголеми правичноста на даночниот систем и ќе ја ублажи растечката нееднаквост.