Снежната бура „Барбара“ ги затвори училиштата и продавниците и го прекина сообраќајот во Атина

Обилните снежни врнежи и ниските температури денес ги затворија училиштата и продавниците во грчкиот главен град, а многу јавни служби и бизниси се префрлија на работа од далечина.

Сообраќајот на некои централни патишта и на националниот пат што ја поврзува Атина со централна Грција беше запрен бидејќи бурата „Барбара“ ја премина земјата и предизвика снежни врнежи во главниот град, објави Катимерини.

Некои метро станици во близина на меѓународниот аеродром во градот исто така беа затворени, а железничките линии кон северниот град Солун се суспендирани.

Властите ги повикаа граѓаните да избегнуваат непотребни патувања.

Според државната телевизија ЕРТ, спасувачките екипи на противпожарната бригада евакуирале четири лица чиј автомобил бил заглавен во снегот во атинското предградие Аспропиргос.

Студот се очекува да продолжи до вторник и постепено да ги зафати источните и јужните предели, вклучувајќи го и островот Крит.

Обилниот снег е реткост во грчката престолнина, но земјата трета зима по ред е погодена од екстремни временски услови. Се до денешниот снег, зимата во Грција беше невообичаено блага за овој дел од годината.