Skip to content
Студентскиот протест во Србија е најмасовниот протест по падот на Слободан Милошевиќ и претставува најголем предизвик за авторитарната власт на Александар Вучиќ во последните 12 години”, вели Срѓан Цвијиќ, српски политички аналитичар и претседател на Меѓународниот советодавен комитет на Белградскиот центар за безбедносна политика.
Според Цвијиќ, овој протест претставува клучен момент во политичката динамика на Србија, што го прави невозможно враќање на политичкиот статус кво.
„Овој протест е најголем и најмасовен од времето на падот на Милошевиќ и е најголем предизвик за власта во последните 12 години. Студентите успеаја да ја мобилизираат јавноста и да предизвикаат реакција која не може да се игнорира“, додава Цвијиќ.
Како што нагласува, протестите се израз на растечкото незадоволство и политичката одговорност која треба да биде превземена од властите.
Цвијиќ смета дека барањата на студентите ќе мораат да бидат исполнети, а тоа ќе доведе до политичка и можеби кривична одговорност за власта, особено за трагични настани како смртта на 15 лица во Нови Сад и осум во старски дом во Белград.
-Барањата на студентите ќе мораат да бидат исполнети, а тоа ќе значи политичка, а можеби и кривична одговорност на самите власти за бројни афери кои ја потресуваат Србија. Студентите покажаа голема решителност и организација, што е клучно за овие протести, додаде тој.
Од вчера, во 10 часот, започна еднодневната блокада на крстосницата Автокоманда која привлекува голем број студенти, како и поддршка од средношколците и граѓаните. Иако полицијата го обезбедуваше тој дел од патот, не беа забележани инциденти. Насобраните студенти во текот на вечерта организирано се дружеле, подготвувале храна и играле игри, а некои од нив пееле и играле фудбал.
„Речиси никој не спиеше. Играа табла, некои фудбал, а други пееја“, изјавија присутните на блокадата. Возачите кои утринава поминуваат по автопатот, свират во знак на поддршка, а на надвозникот и понатаму стојат транспарентите кои ги бараат исполнувањето на студентските барања и одбележуваат бројот 15, како почит кон загинатите во трагедијата во Нови Сад.
Студентите одржаа 15-минутно молчење на Железничката станица во Нови Сад во сеќавање на жртвите, а денот го продолжија со различни настапи и програми. Како дел од акцијата, студентите ги вклучија светлата на своите мобилни телефони и ги насочија кон небото, создавајќи визуелен ефект кој ја нагласи големината на протестот.
На протестот им се приклучија и граѓани кои ги поддржуваат студентите во нивните барања за правда. Српскиот претседател Александар Вучиќ во вчерашното обраќање најави дека ќе побара реконструкција на владата и најави дека е подготвен да потпише одлука за помилување на студентите и останатите лица кои беа приведени за време на протестите.
Соња Танеска
