Веројатно најстарата населба покрај езеро во Европа откриена на албанската страна од Охридското Езеро

Археолозите тврдат дека на албанската страна од Охридското Езеро е откриена најстарата човечка населба покрај европско езеро, стара и до 8.000 години.

Тим научници од Швајцарија и Албанија секојдневно поминуваат по три часа под вода, макотрпно отстранувајќи дрвени столбови што го поддржувале живеалиштето на древните жители. Ова истражување, објавено од агенцијата Ројтерс, открива и други археолошки наоди како коските од домашни и диви животни, бакарни предмети и керамика со сложени резби.

Алберт Хафнер од Универзитетот во Берн посочува дека, иако слични населби се познати во алпскиот и медитеранскиот регион, населбата во Лин, Албанија, е најстарата досега откриена, датирајќи од пред 6.000 до 8.000 години, што ја прави околу половина милениум постара од другите.

„Органскиот материјал е одлично зачуван поради условите под вода, што ни овозможува да откриеме детали за исхраната и земјоделските активности на овие луѓе“, објаснува Хафнер.

Охридското Езеро, кое се наоѓа на границата меѓу Албанија и Северна Македонија, се смета за најстарото езеро во Европа, со возраст од над еден милион години.

Староста на пронајдоците е утврдена со радиоизотопско датирање и дендрохронологија — техника што ја брои годишните прстени на дрвјата. До сега од локацијата се собрани повеќе од илјада примероци од дрво.

Се проценува дека населбата се простирала на околу шест хектари и можела да биде дом на неколку стотици луѓе. И покрај тоа што истражувањето трае веќе шест години, ископаниот материјал досега сочинува само околу еден процент од вкупната археолошка зона.