Весиќ: Функционираат таговите со Северна Македонија, наскоро и со Хрватска, БиХ и Грција

Интегрираниот систем за наплата со Северна Македонија работи многу добро, изјави денеска министерот за градежништво, транспорт и инфраструктура на Србија, Горан Весиќ, најавувајќи дека истиот систем наскоро ќе се воспостави и со Хрватска, Босна и Херцеговина и Грција.

Весиќ објасни дека реконфигурацијата на ознаката подразбира преминување кон „постпејд“ систем за плаќање, односно наместо граѓаните да плаќаат пари на тагот, што сè уште е можно и важи само за Србија, треба да го врзат за платежна картичка.

„Потребни се пет минути. Со таков таг можете да поминете низ сите девет патарини во Северна Македонија. Ако веќе имате пари на тагот, тие ќе ви бидат вратени на сметката“, рече Весиќ во гостувањето на ТВ Хепи и потсети дека за сите што не ја реконфигурирале „ознаката“, туку тргнале на пат, шалтерот „Патишта Србија“ бил поставен на последната наплатна станица во Србија, во Прешево.

Тој додаде дека реконфигурација се врши на 25 места во „Патишта Србија“, Пошта и АМСС, како и на наплатната станица во Прешево.

„Секој ден реконфигурираме околу илјада тагови и продаваме исто толку нови откако го ставивме во функција интегрираниот систем за наплата“, рече Весиќ.

Тој најави дека наскоро ќе се воспостави систем на заедничка наплата со Хрватска, Босна и Херцеговина и Грција.

„Со Хрватска изминавме долг пат по тоа прашање, како и со Босна и Херцеговина, а наскоро за тоа ќе разговарам и со мојот грчки колега“, рече министерот.