Skip to content
Албанскиот премиер Еди Рама доживеа напад на бес за време на пренос во живо на социјалните мрежи. Видно изнервиран, тој почна да пцуе и силно да удира по масата, а видеото од инцидентот брзо стана вирално.
Рама зборуваше за апсењето на градоначалникот на Тирана, Ерион Велиaj, негов долгогодишен соработник, истакнувајќи дека бил сменет без судење и ставен во затворска ќелија. Додека зборуваше, поради пречките во преносот сè повеќе се вознемируваше, фаќајќи се за главата, по што со рака удри по масата. Во еден момент, го зграпчи телефонот од кој го емитуваше преносот, случајно покривајќи ја камерата со прстите, а во позадина се слушаше како неколку пати пцуе.
Преносот беше прекинат, но подоцна Рама повторно се огласи преку Facebook Live, признавајќи дека понекогаш има испади на бес кога работите не одат според планот.
„Мило ми е што овој момент остана забележан на Instagram, затоа што покажува кој е тука со срце и душа, кој се бори за Албанија, за правда, за демократија и за Европа“, изјави Рама, а неговите зборови ги пренесе Tirana Post.
Опозицискиот лидер Сали Бериша, пак, објави снимка од инцидентот на својот Facebook профил, додавајќи дека премиерот изгубил контрола откако бил спомнат Крис ЛаСивите, еден од менаџерите на кампањата на Доналд Трамп, кој е ангажиран за претстојните избори во Албанија.
„Еди, поднеси оставка! Остави ја дрогата, штетна е за твоето здравје!“ – му порача Бериша.
