Skip to content
Романија приведе шест лица под обвинение дека се обиделе да ја соборат државата со помош на Русија, објавија државното обвинителство, а 101-годишен поранешен армиски генерал изјави дека неговиот дом бил претресен како дел од истрагата, пишува Ројтерс..
Осомничените беа приведени во средата, истиот ден кога Романија – земја членка на Европската унија и НАТО – ги прогласи военото аташе на руската амбасада и неговиот заменик персона нон грата за, како што рече, дела кои се во спротивност со дипломатските правила.
Москва соопшти дека ќе одговори на потегот.
„Членовите на криминалната група постојано контактирале со агенти на странска сила, лоцирани и во Романија и во Руската Федерација“, се вели во соопштението на агенцијата за борба против организираниот криминал DIICOT, во која не се наведени имињата на осомничените.
Романската разузнавачка агенција СРИ соопшти дека двајцата протерани руски дипломати „собирале информации во области од стратешки интерес и презеле мерки за поддршка на антиуставните потези на групата“.
Руското Министерство за надворешни работи ги отфрли обвинувањата како „шпекулации“.
„Опсесијата на Букурешт да бара ‘„’руски траги’ во внатрешно-политичките борби на Романија не е нов феномен“, соопшти Министерството на платформата за социјалните медиуми Х. „Русија нема навика да се меша во внатрешните работи на другите“.
ВОЕНА СТРУКТУРА
Обвинителите рекоа дека групата имала воена структура, а судски извори како осомничен го именуваат 101-годишниот поранешен армиски генерал Раду Теодору.
Теодору, познат по негирањето на холокаустот, кој постојано го пофали романското фашистичко раководство од Втората светска војна, во снименото интервју со неговата ќерка објавено на неговата страница на Фејсбук рече дека актуелната влада е „антироманска и систем организиран да ја ограби оваа земја“.
„Тие ја потрошија оваа земја и сега се бранат и наоѓаат причини да ја дезинформираат јавноста“, додаде тој. Теодору не одговори веднаш на барањето за коментар.
Обвинителите рекоа дека групата презела чекори за да преговара со надворешните сили во врска со потенцијалното повлекување на Романија, која ја дели границата со Украина, од воената алијанса на НАТО.
Тие рекоа дека групата имала за цел да воспостави нова влада и да го распушти сегашниот уставен поредок, со воведување ново знаме, национална химна и промена на името на земјата.
Политичките тензии се високи во Романија откако нејзиниот највисок суд ги поништи претседателските избори во декември поради обвинувањата за руско мешање – кои Москва ги негираше – во корист на фаворитот на екстремната десница Калин Георгеску.
Георгеску и самиот е под истрага по шест обвиненија, кои сите ги негира.
Истрагата објавена во четвртокот не е поврзана со Георгеску, рекле за Ројтерс извори од обвинителството. Судски извори, цитирани од ТВ станицата Антена3, рекоа дека еден од протераните руски функционери бил поврзан со Георгеску.
