Skip to content
Српскиот претседател Александар Вучиќ се обрати по денешниот голем студентски протест во Белград од Палатата Србија.
Вучиќ на почетокот на своето обраќање рече дека сака да го изрази своето задоволство што „се одржа голем протест, со огромна негативна енергија и гнев и бес изразен кон властите, без жртви или сериозни повреди“.
Вучиќ рече дека се повредени вкупно 56 лица, но дека никој не е тешко повреден. Уапсени се 22 лица.
За бројот на учесници на протестот
„Проценките од нашите три различни служби се движат од војската дека имало 88.000, до полицијата, чија конечна проценка е 107.000. „БИА процени нешто измеѓу“, рече Вучиќ, додавајќи дека на протестот дошле изненадувачки број луѓе од внатрешноста, и од југот и од северот на земјата.
Негираше дека бил употребен звучен топ
Вучиќ ги негираше обвинувањата дека на денешниот протест бил употребен звучен топ, нарекувајќи ги тврдењата срамни.
„Денес не ја кренавме палката. Настрадаа полицајците… Над 60 топовски истрели, ракети и гранати беа испукани во Паркот на Пионерите, чиј број не е познат. Оштетени и уништени се повеќе од 100 трактори на српските домаќини“, рече Вучиќ, наведувајќи дека без трактори ќе беше тешко да се запре крвопролевањето.
Тој уште еднаш повтори дека денешниот митинг не е регистриран, нарекувајќи го обид за обоена револуција.
„Горд сум на фактот што 99 отсто од студентските блокатори не сакаат инциденти. Тие и вечерва по првите инциденти и меѓусебни расправии го напуштија митингот и рекоа „Ова не е наше“, рече Вучиќ.
Во продолжение на обраќањето, Вучиќ ги повика студентите внимателно и искрено да ги анализираат другите три барања, без притисоци од, како што рече, лажни експертски групи и ќе видат дека се исполнети.
Да потсетиме, денеска во Белград се одржа студентски протест кој во еден момент беше прекинат откако почнаа инциденти. Студентите се забарикадираа, обезбедувањето ги соблече елеците и ги повика граѓаните да се повлечат од просторот пред Собранието.
