Вучиќ во Брисел: Сите земји од Западен Балкан истовремено да се приклучат кон ЕУ

За време на средбата во Брисел со претседателката на Европската комисија, Урсула фон дер Лајен, и претседателот на Европскиот совет, Антонио Кошта, српскиот претседател предложи сите земји од Западен Балкан истовремено да се приклучат кон Европската унија, пренесуваат српските медиуми.

„Накратко ја презентирав идејата за заеднички прием на земјите од Западен Балкан во ЕУ. Не гледам зошто ова би го загрижило некого во регионот. Ја презентирав идејата околу 2 минути. Ме слушаа како учтиви луѓе и не рекоа ништо. Го предложив ова затоа што многу добро ја познавам вашата земја, но и земјите од регионот“, рече Вучиќ по разговорот во Брисел.

Во врска со реакцијата на црногорскиот премиер Милојко Спаиќ, кој рече дека Црна Гора ќе ја чека Србија во ЕУ од 2028 година, Вучиќ рече следново: „Предложив нешто што го сметам за одговорно и мудро. Ако мислите само на себе и не го гледате вашиот сосед и не велите погледнете што сум постигнал, а вашиот сосед не е богат и не прави добро, тоа не е најдобро“.

„Го кажав ова од рационални причини, не ирационални, не политички, бидејќи некој ќе биде таму пред нас. Прво скокате, потоа велите „oп“. Го кажав ова бидејќи мислам дека е најдоброто решение. Да ви кажам, Србија влезе и нема да ве прашам сега со која територија, а Приштина не. Како ќе го решиме овој проблем, бидејќи некој треба да размисли за тоа. И што треба да правам, на пример, со Босна и Херцеговина во таков случај? Тогаш Бошњаците од Нови Пазар ќе мора да ја преминуваат границата три пати потешко за да стигнат до Сараево и обратно. А Србите од Бјелина, Бања Лука, Требиње, Зворник и секое друго место ќе мора да ја преминуваат границата три пати потешко отколку што е денес, наместо да имаат отворени граници, како што предлагам“, истакна шефот на српската држава и посочи дека не предлага сите во регионот да чекаат заедно.

„Мислев дека сите ќе бидеме дел од Европската Унија со текот на времето, или ако сакате, предвреме. Зошто ова некого го загрижува? Па, ќе бидам среќен за секој успех на Скопје, за секој успех на Бања Лука, за секој успех на Плевља, Саранда, Елбасан или каде било на друго место. Кој е проблемот со тоа? И кога ќе видите дека нема проблем, тогаш е јасно дека има некои други причини“, продолжи тој.

По средбата со Александар Вучиќ, Урсула фон дер Лајен и Антонио Кошта изјавија дека за време на разговорот бил анализиран напредокот на Србија на патот кон Европската Унија и дека Србија може да смета на поддршката од ЕК на овој пат.

„Разговаравме за важноста од забрзување на реформите, особено во областите на владеењето на правото и слободата на медиумите. Нагласивме дека проширувањето е геостратешки императив и потребата Србија да биде поблиску усогласена со надворешната и безбедносната политика на ЕУ. Ги поздравивме чекорите што ги презеде Србија за диверзификација на своите енергетски извори и правци и за намалување на зависноста од Русија, чија несигурност е демонстрирана многу пати“, напиша Фон дер Лајен на Х.

Коментарот на Кошта беше многу краток. „Среќен сум што се сретнав со Вучиќ за да го анализираме напредокот на Србија на патот кон ЕУ“, напиша тој на Х.