Skip to content
Кога Рубија Даниелс првпат им кажала на пријателите дека во Италија купува шест куќи за само еден евро, мислеле дека се шегува. Но во 2019 година, оваа 51-годишна консултантка за урбанистичко планирање, која од 1996 година живее во Сан Франциско, навистина го направила тоа – купила шест руинирани куќи во Мусомели, старо планинско гратче на Сицилија, преку локална иницијатива за оживување на напуштени недвижности, пишува CNBC.
Секако, постоел и „фат“ со тие куќи: биле во различни фази на распаѓање – некои без покрив, без основна инфраструктура.
– Спакував шест куфери со алат и агрегат – се присетува Даниелс.
Заедно со сопругот и братучедот отпатувала во Италија за да го преземе сопствеништвото врз куќите, откако потрошила вкупно околу 22.500 евра на административни и агенциски трошоци.
И покрај руинираната состојба, Даниелс, која повеќе од 16 години работи како консултант за просторно планирање, била целосно опуштена.
– За мене е природно да преуредувам простори и да уринам ѕидови. Мојот сопруг, на пример, паничи кога ќе ме види како ги разгледувам овие проекти, но за мене тоа е мешавина од возбуда и радост – изјавила таа.
Првата куќа, која била целосно урната, сега е целосно обновена.
– Има прекрасна спална соба од мермер – рече таа.
Обновата ја чинела околу 56.500 евра, а се надева дека нема да мора ништо да санира наредните 50 години. Нејзината визија не завршува со семејните домови – една од шесте куќи ќе биде претворена во центар за јога и медитација.
– Би било убаво на овој начин нешто да ѝ се врати на заедницата – рече таа.
За обновата користела локални занаетчии – од мијалници до подови, сè е набавено во Мусомели.
– Сакавме сè да го направиме во и со заедницата каде што ги купивме недвижностите. Обожаваме да сме тука, многу е поубаво отколку во Калифорнија – објаснува таа.
Она што ја привлекло во Мусомели не биле само ниските цени, туку и начинот на живот.
– Никој не се брза, сè е пристапно. Кафе и кроасан чинат 1,50 евра. Во Калифорнија сè е површно и стресно – вели Даниелс.
Сега нејзините две тетки, на возраст од 70 и 82 години, планираат трајно преселување во ова сицилијанско планинско место. Иако нејзиниот потфат на почетокот предизвикал чудење меѓу пријателите во САД, некогаш заборавениот Мусомели сега привлекува внимание од целиот свет.
– Моментално најмалку 30 луѓе размислуваат да купат една куќа – изјавува таа, објаснувајќи колку иницијативата станала популарна.
За Рубија причината за преселбата отсекогаш била јасна:
– Куќата практично ја добиваш бесплатно, а можеш да ја претвориш во што сакаш.
