Skip to content
Арина Сабаленка стигна до своето четврто последователно финале на Австралија Опен. Таа убедливо ја победи Елина Свитолина со 6-2, 6-3 за нешто повеќе од еден час и 15 минути игра. Белорусинката стигна до натпреварот за трофејот без да изгуби сет.
Денес, светската тенисерка број 1 имаше проблеми на почетокот на натпреварот. На Свитолина ѝ беа доделени две брејк-топки во првиот сервис-гем на Сабаленка, но ги потроши, а набргу потоа, фаворитот во натпреварот беше предупреден од стол-судијата за прекумерно викање помеѓу првиот и вториот сервис на нејзината противничка. Сепак, ова не влијаеше негативно на Сабаленка, која едноставно беше посилна и поконзистентна во своите удари за да ја запре Свитолина.
Сабаленка заврши со 29 винери и 15 неизнудени грешки. „Не можам да верувам, навистина. Тоа е неверојатно достигнување. Но, мојата работа тука не е завршена“, предупреди двократната шампионка во Мелбурн.
Во сабота, таа ќе се бори за трета титула на австралиска почва по 2023 и 2024 година. Минатата година, Белорусинката беше запрена во финалето од Американката Медисон Кис.
Сега нејзина противничка ќе биде Џесика Пегула, која ја елиминираше Кис во осминафиналето, или Елена Рибакина. Казахстанката ќе има шанска да ѝ се одмазди на Сабаленка за поразот во финалето во 2023 година.
Свитолина, од своја страна, не успеа да стигне до меч за титулата на Гренд слем во својот четврти обид по поразите во полуфиналето на Вимблдон (2019 и 2023) и Отвореното првенство на САД (2019).