„Адолесценција“: Моќна приказна за насилството меѓу младите и феноменот на машкиот бес

Новата криминалистичка драма „Адолесценција“ на „Нетфликс“ ги освои гледачите низ светот, вклучувајќи го и регионов. Оваа мини-серија, составена од четири епизоди, нуди вознемирувачки и длабоко емотивен увид во насилството меѓу младите и факторите што придонесуваат кон него.

Иако „Адолесценција“ не е директно базирана на вистинска приказна, нејзиниот автор Стивен Греам открива дека инспирацијата ја добил од растечката епидемија на убиства со нож во Обединетото Кралство. Соочен со алармантните статистики, Греам чувствувал потреба да ја истражи оваа мрачна реалност и да постави прашања за корените на насилството.

Косценаристот Џек Торн истакнува дека, додека го создавале сценариото, тој, Греам и режисерот Филип Барантини биле фасцинирани од феноменот на „машкиот бес“. Преку серијата, тие се обидуваат да ја истражат оваа појава, анализирајќи како општеството ги обликува младите мажи и кои се последиците од игнорирањето на овој проблем.

Приказната ја следи судбината на 13-годишниот Џејми Милер (Овен Купер), кој е обвинет за убиство на негова соученичка. Неговиот татко, Еди Милер, кој го толкува самиот Стивен Греам, се обидува да го разбере и заштити својот син во оваа шокантна ситуација.

Особено впечатлив е изборот секоја епизода да биде снимена во еден непрекинат кадар, создавајќи чувство на интензивна непосредност и автентичност. Оваа режисерска техника го нагласува емоционалниот набој на серијата и ја зголемува тензијата.

Критичарите ја пофалија серијата, а гледачите се воодушевени. Но, истото прашање останува нерешено: дали оваа потресна приказна има вистинска основа?

Иако „Адолесценција“ не е директно базирана на вистински настан, авторот Стивен Греам открива дека инспирацијата ја добил од растечката епидемија на убиства со нож во Обединетото Кралство.

„Бев шокиран. Си помислив: „Што се случува? Во какво општество живееме кога момче смртно прободува девојче? Што довело до овој настан?“ А потоа, тоа повторно се случи. И уште еднаш. И уште еднаш. Навистина сакав да го потенцирам овој проблем и да го поставам прашањето: „Зошто ова се случува денес? Што не е во ред со нас? Како стигнавме до овде?“ – додава Греам.

Според податоците на Канцеларијата за национална статистика, 83 отсто од убиствата на тинејџери во периодот 2023-2024 биле извршени со нож. Во текот на таа година во Англија и Велс (без Манчестер) биле регистрирани околу 50.500 кривични дела поврзани со остри предмети, што претставува зголемување од 4,4% во споредба со претходниот период. Малолетниците на возраст од 10 до 17 години биле одговорни за околу 17,3% од овие кривични дела.

„Адолесценција“ не е само криминалистичка драма, туку и социјален коментар кој отвора многу значајни прашања. Серијата не нуди едноставни одговори, туку ги тера гледачите да размислуваат за системските проблеми што доведуваат до вакви трагедии. Со импресивни актерски изведби, иновативна режија и провокативна содржина, оваа мини-серија дефинитивно заслужува внимание.