Ајфеловата кула затворена поради националниот штрајк во Франција

Франција денеска беше зафатена од масовни протести и национален штрајк што ги организираа водечките синдикати, како реакција на најавените буџетски кратења и барањето за повисоки даноци за најбогатите.

Демонстрации се одржаа во повеќе од 200 градови низ земјата. Во Париз, колоната со вработени, пензионери и студенти тргна од Плас д’Итали, додека култниот симбол на градот – Ајфеловата кула – беше затворен поради штрајкот.

Протестите следат во период на политичка нестабилност, по падот на малцинската влада на Франсоа Бајру минатиот месец, која беше соборена со недоверба поради контроверзниот план за заштеда од 44 милијарди евра. Новиот премиер Себастиен Лекорњу сè уште не го претставил буџетот и не ја формирал својата влада, додека поделениот парламент треба да дебатира за финансискиот план до крајот на годината.

Франција моментално се соочува со сериозен фискален предизвик: дефицитот во 2024 година достигна 5,8% од БДП, а јавниот долг е над 3,3 трилиони евра – повеќе од 114% од економскиот аутпут.

„Три дена протести без влада и буџет – тоа е јасен знак на социјален бес“, изјави Софи Бине, лидерка на синдикатот CGT, нагласувајќи дека работниците бараат нивниот глас да се слушне токму во моментот кога се носат клучните одлуки.

Иако Министерството за внатрешни работи објави дека денеска надвор од Париз протестирале околу 85.000 луѓе, одзивот е помал од оној на 18 септември, кога според полицијата марширале половина милион, а според синдикатите дури еден милион граѓани.

Железничкиот сообраќај беше делумно нарушен, неколку линии на метрото во Париз работеа со намален капацитет, а на протестите им се приклучија и наставници и здравствени работници.

Штрајкот од денеска е дел од континуираната синдикална мобилизација, која минатата недела кулминираше со акцијата „Блокирај сè“, кога беа парализирани сообраќајот и делови од јавниот живот во Франција.