Американците и Советите се откажаа, но Кина не: Изгради реактор со помош на ториум од пустината Гоби

Кинеските научници успешно го лансираа првиот оперативен нуклеарен реактор со стопена сол (TMSR-LF1) во светот базиран на ториум во пустината Гоби.

Веќе некое време во функција е прототип со капацитет од два мегавати. Проектот за реактор од 10 мегавати, управуван од Шангајскиот институт за применета физика (SINAP) на Кинеската академија на науките, се очекува да биде оперативен до 2030 година.

Сју Хонгџие, раководител на научниот тим задолжен за проектот за реактор со ториум, рече дека ја развиле технологијата врз основа на напуштените американски истражувања за технологијата на реактори со стопена сол од 1960-тите. Освен САД, и Советскиот Сојуз ја развил истата технологија, но двете земји се откажале пред околу 50 години. Тие се фокусирале на технологијата на реактори со вода под притисок, загреана со ураниум.

„САД ги оставија своите истражувања јавно достапни, чекајќи го вистинскиот наследник. Ние бевме тој наследник. Совладавме сè што пронајдовме во литературата, а потоа продолживме понатаму“, рече тој.

Атрактивноста на ториумот е во тоа што може да помогне во постигнувањето енергетска самоодржливост со намалување на зависноста од ураниум, особено за земји како Индија, кои имаат огромни резерви на ториум.

Кина би можела да го стекне ториумот како остаток, односно отпад во рударската индустрија при копање разни минерали.

Неговата употреба би обезбедила практично неисцрпни резерви на гориво.

Кинеската покраина Гансу развива идеи за поморски и воздухопловни апликации за ова идно снабдување со енергија, соопшти кинеската новинска агенција Синхуа.

Според извештајот на Кинеската академија за науки за влијание врз животната средина, јадрото на реакторот со стопена сол ќе биде високо три метри и со дијаметар од 2,8 метри, ќе работи на 700 степени Целзиусови, ќе има топлинска моќност од 60 мегавати MW, заедно со 10 MW електрична енергија.

Ториум-232, кој се наоѓа во магматски карпи и тешки минерални песоци, е позастапен на Земјата од изотопот што најчесто се користи во нуклеарно гориво, ураниум-235. Но, овој слабо радиоактивен метал не може да претрпи фисија, односно разделување на атомските јадра што произведува енергија, туку прво мора да се трансформира во фисионен ураниум-233.

Овој успешен експеримент ја докажа одржливоста на оваа технологија.

Некои од нејзините значајни предности се:

-помалку радиоактивен отпад бидејќи ториумските реактори произведуваат значително -помалку долгорочен нуклеарен отпад во споредба со конвенционалните реактори што користат ураниум.
-поголема безбедност, бидејќи ториумските реактори се поотпорни на нуклеарни катастрофи бидејќи процесот на согорување на ториумот не може да предизвика неконтролирана верижна реакција.
-помала опасност од употреба за нуклеарно оружје, бидејќи за разлика од ураниумот и плутониумот, ториумот е потежок за употреба за производство на нуклеарно оружје.