Американскиот долар на најниско ниво во последниве три години: Што значи тоа за глобалната економија?

Американскиот долар бележи значителен пад, достигнувајќи го најниското ниво во последните три години – тренд што сериозно ги загрижува инвеститорите и финансиските аналитичари ширум светот.

За американските компании што увезуваат производи од странство, оваа ситуација претставува дополнителен притисок. Освен царинските давачки, сега се соочуваат и со повисоки трошоци за увоз поради ослабената вредност на доларот. Традиционално, во периоди на пазарна нестабилност, доларот се сметаше за сигурно засолниште, но овој пат не е така.

По пандемијата, доларот доби на сила благодарение на релативно силниот економски раст во САД. Вредноста дополнително се зголеми минатата есен, поттикната од надежите дека администрацијата на Доналд Трамп ќе го одржи позитивниот тренд. Но, со воведувањето на новите царини, економската пресметка се смени – и сè повеќе аналитичари сега прогнозираат забавување на американскиот раст.

Дополнително, трговските бариери предизвикаа политички тензии и доведоа до зголемени каматни стапки на американските државни обврзници – што пак поттикна шпекулации за можен поширок одлив на капитал од САД. Некои дури предвидуваат и потенцијално слабеење на доларот како глобална резервна валута.

„Ова укажува дека инвеститорите воопшто се претпазливи кога станува збор за американските финансиски средства,“ вели Џон Канаван, главен аналитичар во Oxford Economics.