Американскиот долар зајакнува втора недела по ред – што стои зад тоа?

Американскиот долар продолжи да добива на вредност втора недела по ред, поддржан од знаци на попуштање на трговските тензии меѓу САД и Кина, како и од променливите очекувања околу идните чекори на Федералните резерви во поглед на каматните стапки.

Индексот на доларот, кој ја мери вредноста на американската валута во однос на шест други водечки светски валути, се искачи за 0,45 проценти во текот на минатата недела, достигнувајќи ниво од 100,04 поени.

Еврото, пак, падна за 0,6 проценти и се тргуваше по 1,1295 долари, додека доларот доби 0,9 проценти во однос на јапонскиот јен, достигнувајќи 144,95 јени.

Трговски дијалог наместо ескалација

Позитивниот импулс за доларот дојде по сигналите дека Пекинг е подготвен за нов круг трговски разговори со Вашингтон, по неколкунеделен застој. Аналитичарите предупредуваат дека преговорите ќе бидат долготрајни и непредвидливи, но дури и најавата за дијалог е доволна за да се стабилизираат девизните пазари по серијата на растечки царински притисоци.

Американската економија покажа знаци на забавување – податоците за првиот квартал укажуваат на неочекуван пад на БДП, додека производствениот PMI индекс падна повторно во април. Тоа го засили очекувањето дека ФЕД би можел да прибегне кон намалување на каматните стапки за да го поттикне растот.

Сепак, во петокот беше објавено дека американската економија креирала 177.000 нови работни места во април – бројка што е помала од претходниот месец, но сепак над прогнозите. Тоа ги намали шансите за намалување на каматите во јуни од 60 на 50 проценти.

Глобален контекст

Стабилноста на доларот во вакви услови ја нагласува неговата улога како „валута засолниште“ во времиња на геополитичка и економска неизвесност. Иако предизвиците за американската економија не се занемарливи, девизните пазари засега покажуваат доверба во доларот како средство за заштита од ризик.