Британија и Франција се согласни дека трговска војна не е во ничиј интерес по воведувањето на новите царини од САД

Британскиот премиер Кир Стармер и францускиот претседател Емануел Макрон се согласија дека трговска војна не е во ничиј интерес, но предупредија дека ништо не треба да се исклучи, откако американскиот претседател Доналд Трамп воведе нови царини.

Стармер и Макрон разговарале по телефон, а францускиот претседател ја нагласил потребата од тесна координација помеѓу земјите од Европската унија (ЕУ) и Велика Британија во однос на новите царини, како и за потребата од европско единство.

„Додека глобалната економија трпи шок од тарифите наметнати од САД, ние ја потврдивме нашата желба тесно да ги координираме нашите позиции во тековните разговори со претседателот Трамп“, изјави Макрон, додавајќи дека Европа треба да остане обединета и решена да ги заштити своите граѓани и бизниси.

Велика Британија, која ја напушти ЕУ пред повеќе од четири години, избегна дел од американските царини што ја погодија ЕУ и се надева на подобар договор со САД.

Претседателката на Европската комисија Урсула фон дер Лајен изјави дека не е доцна за преговори и дека ЕУ е подготвена да одговори на новата ситуација.