Британска пошта ја купи чешки милијардер за 4.3 милијарди евра

Британската влада ја одобри продажбата на матичната компанија на Кралската пошта (Royal Mail) на чешки милијардер, дозволувајќи и на поштенската јавна компанија да стане странска сопственост за прв пат во својата 500-годишна историја.

Властите потврдија дека групата на ЕП на милијардерот Даниел Кретински може да ја преземе сегашната компанија International Distribution Services (IDS), која управува со британската државната пошта, за 3,6 милијарди фунти (4,3 милијарди евра).

Кретински и IDS се согласија на договорот во мај, но чекаа формално одобрување според законите за национална безбедност поради важноста на поштенската услуга на Обединетото Кралство.

Компанијата ќе остане со седиште во Обединетото Кралство и како дел од договорот, британската влада ќе го задржи таканаречениот „златен удел“, што значи дека ќе мора да ги одобри сите клучни промени во сопственоста на Поштата.

Договорот за преземање, кој допрва треба да биде изгласан од акционерите, се очекува да биде затворен на почетокот на 2025 година.

Кралската пошта, една од најстарите институции во Обединетото Кралство, започна со работа во 1500-тите како институција исклучиво за монархот и кралскиот двор. Таа стана јавна поштенска компанија во 1600-тите.

Продадената компанија, која беше приватизирана во 2013 година, се бореше да се прилагоди на пазарот во последниве години, бидејќи бројот на луѓе кои користат поштенски услуги продолжува да опаѓа.

Кретински има деловни интереси низ Европа, вклучувајќи го и Еурстрим, кој транспортира руски гас преку цевководи низ Украина, Чешка и Словачка. Таа веќе поседува 27 отсто од акциите во IDS, а исто така има удел во трговците на мало во Велика Британија, вклучувајќи го и водечкиот синџир супермаркети Sainsbury’s.

Неговата фирма претходно соопшти дека гледа на IDS како силен бизнис со потенцијал да стане водечка поштенска логистичка групација во Европа.