Детали за инцидентот во Естонија: „Руски Су-35 го наруши воздушниот простор на НАТО – ситуацијата е сериозна“

Естонските власти тврдат дека руски воен авион накратко го нарушил воздушниот простор на НАТО за време на инцидент поврзан со танкер осомничен дека ги прекршил санкциите наметнати врз Русија поради војната во Украина.

Според поранешниот министер за надворешни работи на Естонија, Маргус Цахкна, руски борбен авион летал над Балтичкото Море додека се обидувал да го заштити танкерот „Јагуар“, кој минатата недела беше вклучен на списокот на санкционирани бродови од страна на Обединетото Кралство.

Објавена е и видеоснимка од инцидентот.

Естонската морнарица соопшти дека танкерот пловел во меѓународни води меѓу Естонија и Финска, ги игнорирал наредбите да го промени курсот, и на крајот бил придружуван кон руските територијални води.

„Руски авион го наруши воздушниот простор на НАТО“

„Руската Федерација испрати борбен авион за да ја провери ситуацијата, при што леталото го наруши воздушниот простор на НАТО за околу една минута“, изјави Цахкна за новинарите. „Руската Федерација е подготвена да ја заштити својата ‘флота во сенка’… Ситуацијата е навистина сериозна.“

Руски борбен авион Су-35 се приближил до танкерот и кружел околу него. Според портпаролот на Естонските одбранбени сили, леталото најчесто се задржувало во меѓународниот воздушен простор, но накратко навлегло во естонскиот воздушен простор при приближувањето.

Москва сè повеќе ја користи таканаречената „флота во сенка“ – група од повеќе од сто бродови што се обидуваат да избегнат откривање и надзор со цел да извезуваат нафта во земји како Кина и Индија, заобиколувајќи ги западните санкции. Руските власти тврдат дека сите нивни бродови имаат право на слободна пловидба и дека секој обид за мешање е „неприфатлив и опасен“.