Skip to content
Најмалку девет лица биле убиени во ноќен напад со ракети и беспилотни летала врз Киев. Ова следува само неколку часа откако официјалните лица изјавија дека има напредок кон решавање на конфликтот за време на преговорите во Лондон меѓу претставници на САД, Европа и Украина.
Украинската Државна служба за вонредни состојби соопшти дека 63 лица биле повредени, вклучувајќи шест деца, кои се меѓу хоспитализираните.
„Русија започна масовен комбиниран напад врз Киев“, соопшти Државната служба за вонредни состојби на Телеграм.
Станбените згради се оштетени и „потрагата по луѓе под урнатините е во тек“, се додадава во соопштението.
Бројот на загинати и повредени драматично се зголеми од двајца убиени и 54 ранети што претходно ги објави градоначалникот Виталиј Кличко, кој исто така рече дека шест деца се хоспитализирани.
Градоначалникот на Харкив, Игор Терехов, исто така, објави напад врз градот во североисточна Украина, соопштувајќи на Телеграм дека седум ракети го погодиле градот.
Нападите започнаа неколку часа по завршувањето на разговорите во Лондон и откако американскиот претседател Доналд Трамп изјави дека мисли дека постигнал договор и со рускиот претседател Владимир Путин и со украинскиот претседател Володимир Зеленски за решавање на војната.
„Мислам дека Русија е подготвена и многу луѓе рекоа дека Русија сака да се справи со сè. И мислам дека имаме договор со Русија. Мора да постигнеме договор со Зеленски“, изјави Трамп пред новинарите во Белата куќа.
Трамп, исто така, рече дека му било потешко отколку што очекувал да соработува со Зеленски.
„Мислев дека можеби ќе биде полесно да се справиме со Зеленски. Досега беше потешко. Но, мислам дека имаме договор и со двајцата. Се надевам дека ќе го сторат тоа, бидејќи сакам да заштедам и, знаете, потрошивме многу пари, но станува збор и за човечност“, рече Трамп.
Запрашан за извештаите за предлогот на САД со кој Крим би бил признат како руска територија, Трамп рече дека „нема фаворити“ меѓу Украина и Русија и дека само сака војната да заврши.
Други претставници на администрацијата претходно на 23 април изјавија дека постигнувањето договор останува недостижно и дека САД би можеле да се откажат од мировните преговори во отсуство на брз напредок.
Зеленски, кој го отфрли предлогот за Крим, рече дека емоциите „се зголемиле“ во Лондон, но дека е добро што претставниците на пет земји се сретнале.
„Американската страна ја сподели својата визија. Украина и другите Европејци ги презентираа своите придонеси. И се надеваме дека токму таквата заедничка работа ќе доведе до траен мир“, рече Зеленски на X.
Неговиот пост вклучуваше копија од изјавата од 2018 година на тогашниот државен секретар на САД, Мајк Помпео, во која се повикува Русија да ја прекине окупацијата на Крим и да го почитува принципот на неменување на границите со сила.
Трамп претходно ја предупреди Украина дека треба да постигне договор за да ги прекине борбите, а остро го критикуваше Зеленски за тоа што рече дека Киев смета дека какво било признавање на Крим како дел од Русија е црвена линија за Украина.
„Токму провокативните изјави како оние на Зеленски го отежнуваат решавањето на оваа војна“, рече Трамп во објава на социјалните мрежи во која негираше дека некој бара од Украина да го признае Крим, кој Москва го анектираше во 2014 година, како руска територија.
Доцна на 23 април, американскиот секретар за финансии Скот Бесент изјави дека се сретнал со украинскиот премиер Денис Шмихал и министерот за финансии Сергеј Марченко во Вашингтон. Во соопштението на Министерството за финансии се вели дека Бесент ја нагласил потребата од потпишување на економско партнерство меѓу двете земји што е можно поскоро.
Во соопштението меѓудругото, се истакнува дека „високопродуктивните технички разговори продолжуваат меѓу двете страни“.
Разговорите во Лондон веќе се соочуваа со сериозни пречки откако врвните дипломати, вклучувајќи го и американскиот државен секретар Марко Рубио, се повлекоа, ефикасно деградирајќи го состанокот.
Портпаролот на британскиот премиер Кир Стармер изјави дека тие вклучувале „суштински технички состаноци со европски, американски и украински претставници за тоа како да се запрат борбите“ предизвикани од целосната инвазија на Русија врз нејзиниот сосед во 2022 година.
„Остануваме апсолутно посветени на обезбедување праведен и траен мир во Украина и овие разговори денес се важен дел од тоа“, рече портпаролот.
Кит Келог, претставникот на Трамп за Украина, ги оцени разговорите како позитивни.
„Време е да се продолжи со воената директива на претседателот Трамп помеѓу Украина и Русија и: да се запре убивањето, да се постигне мир и да се стави Америка на прво место“, напиша Келог на X.
Откажувањето на состанокот меѓу врвните дипломати на Украина, САД, Германија, Франција и Велика Британија ја истакна поделбата меѓу земјите во наоѓањето пат кон мировни разговори, меѓу поплаките на Трамп за недостаток на напредок во преговорите.
„Мислам дека сите го толкуваме на ист начин. САД се еден чекор понапред кон проверка“, изјави за РСЕ еден европски дипломат, кој побара да не биде именуван.
„Го гледам ова како дополнителен притисок врз Украинците: прифати или остави. Немаме време за вас, имаме други работи да правиме“, изјави за РСЕ друг европски дипломат.
Минатата недела, Рубио и други украински и европски претставници се состанаа во Париз на разговори што доведоа до она што многумина го сметаа за мал напредок кон завршување на војната.
Но, Рубио подоцна сигнализираше нетрпеливост на САД во врска со статусот на разговорите и посочи дека САД би можеле целосно да се повлечат од секакво учество во преговорите.
Во разговор со новинарите на 23 април за време на патувањето во Индија, американскиот потпретседател Џ.Д. Венс рече дека Вашингтон издал „многу експлицитен предлог“ до Русија и Украина, иако не даде детали.
„Време е или тие да кажат да или САД да се повлечат од овој процес“, рече Венс.
