Skip to content
Британската јавност е потресена по објавувањето на резултатите од истрагата за смртта на 12-годишната Миа Лукас, која во јануари 2024 година починала во детска психијатриска установа во Шефилд. Поротата утврдила дека трагедијата е последица на повеќекратни пропусти во грижата и надзорот, пренесува Sky News.
Принудно хоспитализиранo дете со сериозни симптоми
Миа била сместена во Центарот Becton, дел од Sheffield Children’s NHS Foundation Trust, откако била принудно хоспитализирана поради акутна психотична епизода. Ималa силни халуцинации, слушала гласови и, според сведочењата, се обидела да земе ножеви од кујна и се борела со својата мајка.
Семејството ја донело во болница на Новогодишната ноќ 2023 година, барајќи итна помош.
Причината за смртта поврзана со недијагностицирана болест
Професорката Марта Коен пред поротата изјавила дека Миа починала поради „компресија на вратот“, но истовремено објаснила дека трагедијата е последица на акутна психоза предизвикана од автоимун енцефалитис — ретка и комплексна воспалителна состојба на мозокот која може да се лекува ако се открие на време.
Консултантот-невролог Мајк Тејлор потврдил дека постоело сомневање за ова заболување додека девојчето било на набљудување, но дека состојбата била дијагностицирана дури по нејзината смрт. Стручњаците пред судот истакнале дека болеста може да предизвика крајно опасни психијатриски симптоми и дека третманите носат сериозни ризици, вклучително и смрт – што ја комплицирало проценката.
„Не ја чуваа – никој не ми ја кажа вистината“
Мајката на Миа, Клои Хејс, сведочела дека почувствувала дека здравствените работници не обезбедиле соодветен надзор:
„Сè што требаa да направат беше да ја пазат. Никогаш не ми ја кажаа вистината за нејзините обиди за самоповредување. Да знаев, никогаш немаше да ја оставам таму.“
Таа додаде дека верува оти Миа „не знаела што прави“ поради состојбата во која се наоѓала.
Повик за реформи и одговорност
Случајот отвори сериозни прашања за функционирањето на детските психијатриски установи во NHS, особено околу следење на пациентите со висок ризик, комуникацијата со семејствата и раното препознавање на ретки, но опасни невролошки состојби.
Истрагата во Шефилд ја потенцира потребата од итни системски реформи – за да се спречат идни трагедии и да се гарантира дека најранливите деца добиваат навремена, внимателна и безбедна грижа.
