Skip to content
Раскинувањето на договорот за црноморското жито ќе има голем број негативни ефекти, изјави турскиот претседател Реџеп Тајип Ердоган, додавајќи дека Турција веќе работи на тоа да го спречи, пренесува Анадолија.
– Прекинувањето на иницијативата за жито во Црното Море ќе има голем број негативни ефекти од зголемувањето на глобалните цени на храната, во некои региони до глад, а потоа и нови бранови на миграција. Не се двоумиме да преземеме иницијатива да го спречиме тоа, им рече Ердоган на новинарите во претседателскиот авион додека се враќаше од турнејата во Заливот каде што посети три земји.
Ердоган најави разговори со рускиот претседател Владимир Путин за договорот за житото во Црното Море.
– Верувам дека преку детални разговори за ова прашање со Путин, ќе обезбедиме продолжување на овој хуманитарен аранжман, додаде тој, навестувајќи ја уникатната улога на Турција како земја со добри односи и со Русија и со Украина, што помогна да се обезбеди првичниот договор, наведува Анадолија.
На 17 јули Русија го прекина учеството во договорот, кој го потпиша во јули минатата година, заедно со Турција, Обединетите нации и Украина, за обновување на извозот на жито од трите украински пристаништа на Црното Море, што беше стопирано по почетокот на руската инвазија.
Кога го обнови договорот во претходните месеци, Москва се пожали дека рускиот дел од договорот не се спроведува. Ердоган истакна дека Путин има очекувања од западните земји во однос на Црноморскиот договор за жито.
– Западните земји мора да преземат чекори по ова прашање, рече тој.
Според овој значаен договор, повеќе од 33 милиони тони жито беа испорачани од украинските пристаништа, избегнувајќи глобална криза со храна. – Продолжувањето на ваквата витална иницијатива во однос на нејзините резултати е во корист на човештвото, рече претседателот Турција.
Тој ги негираше гласините дека важноста на Турција во посредувањето меѓу Русија и Украина е намалена.
„Напротив, ние во моментов ги одржуваме нашите односи со Русија. И министерот за надворешни работи Хакан (Фидан) и шефот на МИТ (Националната разузнавачка организација) Ибрахим (Калин) ги продолжуваат своите преговори“, додаде Ердоган.
Тој изјави дека наскоро би можел да има телефонски разговор со Путин без да чека евентуална средба во август.
Претходно, Ердоган рече дека се очекува Путин да ја посети Турција во август за да разговара за билатералните односи и регионалните прашања, вклучувајќи го и Црноморскиот договор за жито.
– Русија има одредени очекувања. Доколку се исполнат, Русија се залага за функционирање на овој коридор за жито, додаде тој.
Тој рече дека Турција ќе ги искористи сите дипломатски алатки за да обезбеди продолжување на Црноморскиот договор за жито.
– Постигнат е консензус кој му служи на човештвото во воено опкружување и ние ќе се потрудиме да го задржиме. Верувам дека ќе обезбедиме продолжување на Црноморската иницијатива за жито пред да се одолговлечи процесот“, додаде Ердоган.
