Skip to content
Европската комисија официјално го претстави новиот алат за пријавување прекршоци поврзани со примената на Законот за вештачка интелигенција – доверлив механизам што им овозможува на укажувачите да испратат информации за сомнежи за злоупотреби или прекршувања во употребата на АИ технологиите.
Пријавите ќе се поднесуваат директно до Канцеларијата на ЕУ за вештачка интелигенција, која функционира како центар за експертиза во рамките на Европската комисија. Од Комисијата истакнуваат дека укажувачите ќе играат клучна улога во раното откривање на прекршувања, што ќе придонесе за побезбедна, поетичка и потранспарентна примена на вештачката интелигенција во целата Унија.
Според најавите, информациите ќе може да се доставуваат на кој било официјален јазик на ЕУ и во различни формати, во зависност од тоа како укажувачот смета дека најдобро може да ја претстави содржината.
Алатот гарантира високо ниво на безбедност и доверливост: користи сертифицирани методи за шифрирање и им овозможува на укажувачите да останат целосно анонимни. Системот, исто така, овозможува двонасочна комуникација – Канцеларијата за АИ може да испраќа ажурирања за постапките или да поставува дополнителни прашања, без да се загрози идентитетот на укажувачот.
Целта на европскиот Закон за вештачка интелигенција е да се создаде рамка што овозможува иновации, а истовремено ги минимизира ризиците за здравјето, безбедноста, основните човекови права и демократските процеси. Новиот механизам за укажувачи се смета за важен чекор во изградбата на доверба и контролирана примена на вештачката интелигенција во унијата.
