ЕУ ги заострува визните правила за Русите поради воената агресија врз Украина

Европската комисија усвои построги правила за издавање визи на руските државјани за влез во Европската унија, како одговор на, како што соопшти, „зголемените безбедносни ризици што произлегуваат од неоправданата и неиспровоцирана воена агресија на Русија врз Украина“, пренесува Гардијан.

Според новите правила, „руските државјани повеќе нема да можат да добиваат визи со повеќекратен влез“ и ќе мора да аплицираат посебно секојпат кога планираат патување во ЕУ, соопшти Комисијата.

„Целта е да се ублажат заканите по јавниот ред и внатрешната безбедност, додека ќе се овозможат исклучоци само во ограничени и оправдани случаи, како за независни новинари и бранители на човековите права. На тој начин ќе се обезбеди униформна примена на правилата во сите земји-членки и ќе се спречи нивно заобиколување“, се наведува во објаснувањето.

Сите апликации поднесени од руски државјани ќе подлежат на „засилени постапки на проверка и повисоко ниво на надзор“, стои во соопштението.

Шефицата на европската дипломатија, Каја Калас, нагласи дека „патувањето и слободното движење низ Европската унија е привилегија, а не загарантирано право“.