ЕУ ја одложува одлуката за климатската цел за 2040 година

Одлуката за новата климатска цел на Европската Унија, која требаше да се донесе следната недела, е одложена, соопшти данското претседателство со ЕУ.

Одлуката дојде откако германскиот министер за животна средина, Карстен Шнајдер, се откажа од своето барање министрите на ЕУ да одлучат за целта оваа недела. Некои земји-членки изразија желба прашањето да го разгледаат лидерите на ЕУ, наместо министрите за климатски промени.

Европската комисија предложи намалување на емисиите на стакленички гасови за 90% до 2040 година во споредба со нивото од 1990 година, како чекор кон целта за климатска неутралност до 2050 година. Сегашната цел за 2030 година предвидуваше намалување за 55% во споредба со 1990 година.

Очекувањата се новата цел да биде разгледана на самитот на лидерите на ЕУ во октомври, пред почетокот на преговорите со Европскиот парламент за деталите од законот.