Skip to content
Европската унија официјално ја одобри употребата на брашно добиено од ларви на зрнестиот инсект – жолто брашно, во прехранбени производи. Ова високопротеинско брашно ќе може да се користи во мали количини во индустриски пекарски производи, како леб и колачи, како и во сирење, тестенини и преработени производи од компир.
Според Федералната канцеларија за заштита на потрошувачите и безбедност на храната во Германија, научните анализи покажале дека ова брашно не претставува ризик по здравјето. Одредени се и строги ограничувања – лебот може да содржи најмногу 4 грама брашно од ларви на 100 грама производ, додека за сирењето оваа количина е еден грам.
Надлежните истакнуваат дека ларвите се богат извор на хранливи материи, вклучувајќи железо, цинк, витамин Б12 и висока концентрација на протеини (50-55%). Дополнително, нивното производство е поеколошко од традиционалните извори на протеини, бидејќи бара помалку ресурси и генерира помалку емисии на стакленички гасови.
Иако овие аргументи се во прилог на новата практика, јавноста останува скептична. Слична реакција имаше и во 2023 година, кога беше одобрена употребата на брашно од скакулци, што предизвика бурни реакции меѓу потрошувачите. Истражувањата покажуваат дека во Германија, 80% од граѓаните се згрозени од идејата да консумираат инсекти, што останува главна пречка за нивното прифаќање во западната исхрана.
Сепак, надлежните уверуваат дека потрошувачите нема да бидат доведени во заблуда – присуството на инсектни состојки мора јасно да биде означено на производите, со ознаки како „тестенини со брашно од инсекти“ или „бисквити од инсекти“.
