ЕУ следната недела со контрамерки на американските царини

Европската комисија следната недела ќе воведе контрамерки како одговор на американските царини за увоз на алуминиум и челик, додека за царините на автомобили и реципрочните царини од 20 проценти на други производи ќе следува анализа и консултации со земјите-членки.

Од 12 март, САД воведоа царина од 25% за увозот на алуминиум и челик од сите земји, а од 3 април, царините за автомобили и автоделови кои не се произведени во САД се поставени на 25%.

На 2 април, американскиот претседател Доналд Трамп објави трговска војна, најавувајќи реципрочни царини од најмалку 10% за сите земји, а за околу 60 земји, вклучувајќи ја и Европската унија, царините ќе бидат 20%. Царините за Кина ќе бидат 34%.

Не е јасно дали новите царини ќе бидат трајни или ако се дел од преговарачка стратегија на Трамп. Американскиот претседател истакна дека царините му овозможуваат „голема преговарачка моќ“.

До минатата недела, Европската комисија ги консултираше земјите-членки за контрамерки, а се очекува одлуката да биде донесена на 9 април, со примена од 15 април. Комисијата може да донесе одлука ако не се спротивстави квалификувано мнозинство од земјите-членки, што претставува 55% од земјите, кои заедно имаат 65% од вкупното население на ЕУ.

Пропорционалниот одговор од Европската комисија ќе биде вреден 26 милијарди евра, соодветен на економскиот опсег на американските царини. За контрамерките на царините за автомобили и автоделови, Комисијата најавува внимателна анализа пред да донесе одлука.

„Откако американската администрација воведе царини, ЕУ ќе одговори смирено, внимателно и постепено, но единствено, додека ги калкулираме сите наши опции“, изјави комесарот за трговија, Марош Шефчовиќ.

Сите опции остануваат на маса, а Европската комисија нагласува дека контрамерките ќе бидат насочени кон американските производи за кои постојат алтернативи во Европа. „Не планираме да воведеме царини на производи кои не ги произведуваме“, изјави неименуван претставник на Комисијата.

Првичните проценки укажуваат на тоа дека реципрочните царини во вредност од 20 се однесуваат на околу 290 милијарди евра европски извоз во САД, што ќе донесе приход од 58 милијарди евра за САД. Царината на автомобили и автоделови ќе носи 16,5 милијарди евра, а за алуминиум и челик 6,5 милијарди евра.

Комисијата има ексклузивна надлежност над трговијата со надворешниот свет и земјите-членки не можат директно да преговараат со администрацијата на Трамп.