Skip to content
Европската комисија следната недела ќе предложи пакет мерки за зголемување на побарувачката на електрични возила во Европската Унија. Планот има за цел да ја засили конкурентноста на европските производители на автомобили и да ги заштити работните места во индустријата.
Комисијата ќе ги охрабри земјите членки да ги зголемат субвенциите за купување електрични возила и ќе предложи даночни олеснувања за возилата со нулта емисија. Дел од предлогот, во кој увид имаше „Ројтерс“, е и обврската за зголемено користење на електрични автомобили во службените возни паркови, кои сочинуваат околу 60% од годишната продажба на нови автомобили во ЕУ.
Локално производство на батерии – клучен приоритет
Во документот се признава дека европските производители се соочуваат со високи трошоци за компоненти, особено за батерии, кои чинат 30-40% од крајната цена на возилото. Затоа, ЕУ ќе бара поголем удел на батериски ќелии и компоненти произведени во Унијата, како и поддршка за компании кои инвестираат во овој сектор. Странските фирми исто така ќе можат да пристапат до овие фондови, но само ако имаат партнерства со компании во ЕУ.
Намалување на царините и финансиска поддршка
Европските автомобилски компании бараат заштита од казни во вредност од 15 милијарди евра, кои би ги платиле доколку не ги исполнат строгите CO2 норми. Комисијата истражува можности за финансиска поддршка и инвестиции во рециклирање на батерии.
Продажбата на електрични возила во ЕУ минатата година се намали за 5,9%, главно поради недостиг на полначи и укинување на субвенциите во Германија. Јулија Полисканова од „Транспорт и животна средина“ вели дека единствениот начин Европа да остане конкурентна е преку стимулирање на домашното производство на електрични возила.
Комисијата ќе ги претстави деталите од акцискиот план на 5-ти март, а останува да се види како земјите членки ќе реагираат на предложените мерки.
