Skip to content
Европската унија планира да воведе единствена такса од 2 евра за милијардите мали пакети што секоја година пристигнуваат во Унијата, главно од Кина, што дополнително ќе ги оптовари онлајн трговците на мало, како што се „Тему“ и „Шеин“.
Комесарот за трговија, Марош Шефчовиќ, изјави пред Европскиот парламент дека предложил воведување надомест за ракување со пратки, со цел „да се одговори на предизвиците кои ги предизвикуваат 4,6 милијарди пратки што годишно се доставуваат директно до адресите на граѓаните“. Според нацрт-предлогот на Европската комисија, до кој дојде „Фајненшл тајмс“, за пратки испратени директно до крајните корисници ќе се применува такса од 2 евра, додека за пратките што пристигнуваат во магацини, таксата ќе изнесува 0,50 евра.
Дел од приходите од оваа такса ќе се користат за покривање на трошоците за дополнителни царински проверки, додека преостанатиот дел ќе оди директно во буџетот на ЕУ. Повеќе од 90 проценти од овие пратки пристигнуваат од Кина.
„Бројот на опасни производи во ЕУ расте“
Овој потег следува по сличната одлука на САД да го укинат својот режим „de minimis“, кој ги ослободуваше пратките со вредност под 800 долари од царински давачки и документација.
Првиот обид на Доналд Трамп да го ограничи увозот на мали пакети не успеа во февруари, откако американските власти признаа дека немаат капацитет да ги проверуваат сите пратки. Сепак, Трамп повторно го активираше режимот „de minimis“ на 2 мај, истовремено намалувајќи ги царините што претходно беа зголемени на 120 проценти, со цел да изврши притисок врз Кина за време на трговските преговори. Сегашниот режим го прави купувањето евтини производи од странство поскапо за американските потрошувачи.
Во Брисел, Шефчовиќ им порача на пратениците дека „огромниот бран пакети претставува сосема нов предизвик – во однос на контролата, безбедноста и усогласеноста со стандардите“. На пазарот на ЕУ е забележано зголемување на бројот на небезбедни и несоодветни производи, а трговците од Унијата сè почесто се жалат на нелојална конкуренција.
Шефчовиќ нагласи дека овие пратки претставуваат „огромен товар“ за царинските служби. „Оваа такса не би ја нарекол данок, туку едноставно надомест за трошоците што треба да ги покријат самите платформи“, додаде тој.
Според податоците на „Фајненшл тајмс“, само Холандија и Белгија, како главни логистички центри на ЕУ, минатата година примиле над една милијарда пакети.
„Потребно е да воспоставиме контрола“
Ана Кавацини, пратеничка од германските Зелени и претседателка на парламентарниот комитет за внатрешен пазар, ја поддржа иницијативата. „Важно е да воспоставиме контрола. Ова ќе ги поттикне продавачите повторно да користат магацини, како што тоа го правеа порано. За царинските служби е многу полесно да проверуваат примероци од поголеми пратки отколку од поединечни артикли“, изјави таа за FT.
„Тему“ и „Шеин“ сè уште немаат дадено коментар по повод најавените мерки.
Се очекува земјите-членки да го вклучат овој надомест во поширокиот пакет на реформи на царинските правила, кои предвидуваат построги контроли и подобра координација во рамките на единствениот пазар. Како дел од реформата, ЕУ планира да го укине и сопствениот праг на ослободување од давачки („de minimis“) за пратки со вредност под 150 евра. Ова би ги принудило платформите да се регистрираат за ДДВ и, за првпат, да преземат одговорност како увозници за квалитетот на стоките што ги продаваат.
Предлогот беше претставен на Комисијата минатата недела од страна на комесарот за буџет, Пјотр Серафин, како една од опциите за зголемување на приходите во буџетот на ЕУ.
„Оваа такса нема да донесе огромна сума, но секој цент е добредојден“, изјави извор запознаен со дискусијата во Комисијата. „Покрај тоа, тоа испраќа порака дека преземаме иницијатива и решаваме проблем што многумина го сметаат за сериозен.“
