Еве што има на менито екипажот на „Артемис 2“

Екипажот на „Артемис II“, составен од Рид Вајзман, Виктор Гловер, Кристина Кох и Џереми Хансен, полета во среда, 1 април, на 10-дневно патување околу Месечината.

Ова е најдалечното патување што луѓето некогаш го направиле во вселената, а целта на мисијата е, меѓу другото, да се долови најдобриот поглед на другата страна на Месечината. Со оглед на тоа што екипажот ќе помине повеќе од една недела во вселената, многумина се љубопитни за тоа што ќе јадат астронаутите и како се подготвува храната во бестежинска состојба.

Храната во вселената се чува во пакувања кои обезбедуваат долготрајност, како што се кеси со патент и конзерви, за да се спречи расипување. За подготовка се користат микробранови печки и специјализирани печки. Уред сличен на воден пиштол обично се користи за рехидрирање на дехидрираните оброци, а астронаутите го скенираат секое пакување за да водат евиденција за нивната исхрана.

Додека вселенската храна порано беше ограничена на тестенини и дехидрирани оброци, технолошкиот напредок сега им овозможува на астронаутите да јадат поразновидна исхрана, вклучително и свежа храна. Храната е поделена на неколку групи: свежата храна како овошјето и зеленчукот имаат рок на траење од два дена, се чуваат во фрижидер и се јадат брзо. Тие се испраќаат првенствено за да се подигне моралот на екипажот.

Месните и млечните производи се јонизираат пред пакувањето, што го продолжува нивниот рок на траење и го намалува ризикот од микробна контаминација. Исто така, постојат и храна со средна содржина на влага, како што се кисели краставички или сушени производи, кои содржат доволно вода за да се спречи растот на микробите и не бараат дополнителна подготовка.

За мисијата се спакувани и јаткасти плодови, бисквити и чоколадни плочки, како и опции што можат да се рехидрираат. Храната како што се готови оброци се термички обработува за да се уништат бактериите и да се обезбеди здравјето на тимот. Д-р Соња Брунгс, инженер за поддршка на екипажот за Европската вселенска агенција (ЕСА), објасни:

„Термостабилизираната храна едноставно се загрева во грејач, кесата се отвора и е подготвена за јадење. Лиофилизираната храна треба да се рехидрира, што значи додавање топла вода и чекање неколку минути. Се јадат директно од кесата, како и супите. Супата се пие преку сламка, бидејќи микрогравитацијата го отежнува пиењето течности на вообичаен начин.“

Вообичаените јадења и пијалоци во менито вклучуваат тортиљи, леб од цело зрно, гранола од боровинки, киш од зеленчук, колбас за појадок, кускус од јаткасти плодови, салата од манго, говедско месо на скара, макарони со сирење, карфиол и тиква, салата од тропско овошје, колачиња и чоколадо. Пијалоците вклучуваат зелен чај, кафе, лимонада, јаболков цидер и смути од манго и праска.

Командантот Рид Вајзман со себе зеде мала тетратка за да ги запише своите мисли за време на мисијата. Специјалистот за здравјето на членовите на мисијата Кристина Кох носи рачно напишани белешки од најблиските како личен предмет. Џереми Хансен понел јаворов сируп и колачиња од јавор на патувањето, како и четири амајлии во облик на месечина за своето семејство. Пилотот Виктор Џ. Гловер носи Библија, венчални прстени и семејни наследства, заедно со збирка инспиративни цитати.