Европа пред железничка револуција: Ќе бидат ли земјите поврзани со брзи возови до 2040 година?

Десетици нови железнички линии во последните години го олеснија патувањето низ европските граници, но нов амбициозен предлог од тинк-тенк со седиште во Копенхаген има уште поголеми планови. Европската мрежа Starline има за цел да поврзе 39 европски дестинации, вклучително и Велика Британија, Турција и Украина, со нова брза железничка инфраструктура што би функционирала како метро.

Според планот, оваа мрежа треба да ја замени сегашната „фрагментирана, бавна и неефикасна“ железничка инфраструктура, нудејќи ултра брзи врски помеѓу европските градови.

„Вистински интегриран железнички систем повеќе не е само прашање на удобност, туку и стратешка неопходност за издржливоста на Европа во 21 век“, истакнува истражувачкиот центар зад проектот.

Дизајнирана како метро мрежа, Starline има за цел да го промени начинот на кој Европејците го доживуваат континентот – не како збирка од оддалечени главни градови, туку како една динамична, меѓусебно поврзана целина.

Реалност или утопија?

Иако планот е мрежата да биде во функција до 2040 година, се поставува прашањето колку е остварлива оваа визија.

Јасно е дека ваков вид превоз би бил популарен меѓу патниците. Железничкиот транспорт доживеа подем од времето на ноќните возови, а денес повеќе од 400.000 патници годишно користат Interrail, што покажува дека побарувачката за брзо, ефикасно и достапно патување постои.

Сепак, и покрај зголемениот интерес, прекуграничните железнички линии сè уште се соочуваат со предизвици како високи трошоци, бавност и недоволна координација меѓу европските држави. Дали Starline ќе успее да ги надмине овие пречки и да ја трансформира железничката мрежа на Европа, останува да се види.