Skip to content
Европската комисија започна официјална истрага против Google поради сомнежи дека компанијата ги прекршува правилата за конкуренција на Европската унија кога користи онлајн содржини во развојот и функционирањето на своите системи за вештачка интелигенција.
Истрагата се води во две насоки.
Првиот дел се однесува на тоа дали Google презема новинарски и други онлајн содржини од медиуми и веб-страници и ги користи за креирање AI-сажети во пребарувањето, функциите AI Overviews и AI Mode, без да плати надомест или без да им даде на издавачите можност да одбијат нивните материјали да се користат. Проблемот е уште поголем бидејќи многу медиуми зависат од Google пребарувањето за својата посетеност, па одбивањето може да го намали нивниот сообраќај и онлајн видливост.
Вториот дел од истрагата се однесува на YouTube. Комисијата проверува дали Google користи видеа и друг материјал поставен на YouTube за тренирање на сопствените генеративни AI модели, без да обезбеди надомест за авторите и без да им даде можност да се откажат од таквата употреба. Воедно, Комисијата истражува дали правилата на YouTube ги ограничуваат конкурентските AI-компании да користат јавни видеа за тренинг, што потенцијално би му давало на Google нефер предност на пазарот.
Од Европската комисија нагласуваат дека покренувањето истрага не значи дека Google е виновен, туку дека следува детална постапка за утврдување на фактите и можните повреди на европските правила.
