Skip to content
Претседателката на Европската комисија, Урсула фон дер Лајен, денеска во Стразбур ги претстави „црвените линии“ на Европската унија во преговорите за завршување на војната во Украина, истакнувајќи дека ЕУ нема да прифати еднострано прекројување граници ниту ограничување на украинската војска, како и дека поддршката за Киев мора да продолжи со користење на замрзнатата руска имот.
„Русија го следи истиот план од почетокот на војната – верува дека може да ја надживее Украина, Европа и нивните сојузници. Затоа секојпат кога има вистински напредок во преговорите, таа го ескалира насилството“, изјави Фон дер Лајен во Европскиот парламент. Таа додаде дека „бучавата од Кремљ“ ги открива вистинските намери на Москва, за која Украина е само „прв чекор во многу поголема игра“.
Фон дер Лајен ги поздрави напорите на американскиот претседател Доналд Трамп за постигнување мир во Украина и истакна дека конечно започнала изработката на текст за можен мировен договор, иако „пред нас има уште многу работа“.
Таа потврди дека Европската комисија подготвува правен документ за користење на руската замрзната имот за обнова на Украина, нагласувајќи дека „не постои сценарио во кое европските даночни обврзници сами ќе ја сносат таа цена“.
Во своето обраќање, претседателката на Комисијата ги истакна и границите преку кои Унијата нема намера да помине. Според неа, ЕУ не може да прифати ограничување на украинските вооружени сили бидејќи тоа би ја направило земјата ранлива на идни агресии, ниту пак било каква промена на границите со сила, бидејќи тоа би „ги отворило вратите за нови конфликти утре“.
Таа додаде дека иднината на Украина е во Европската унија, што, како што нагласи, не е само „прашање на судбината“, туку и „критичен елемент на секој одржлив безбедносен рамковен договор“.
