Германија е виновна за високите цени на струјата во Европа

Обвинувањата на скандинавските земји се јасни и не сосема неосновани: Германија, во својата потрага по одржливи енергетски извори, се смета за виновник за високите цени на струјата во Европа, особено во зимските месеци. Проблемот, кој Германците го нарекуваат „затишје во темнината“, е поврзан со недостатокот на сонце и ветер во студените зимски денови – клучни за обновливите извори на енергија.

Иако одржливата енергија е важна и потребна, во периоди кога сончевите часови се кратки, производството е недоволно за задоволување на дневната потрошувачка. Дополнително, капацитетите за складирање на произведената енергија се ограничени и недоволни. Во вакви услови, „валканата“ енергија од фосилни или нуклеарни извори обично ја пополнува празнината, но Германија ги намали овие капацитети, што ја влошува ситуацијата.

Кога доаѓа до „затишје“, дистрибутерите се принудени да купуваат струја од европскиот пазар, што предизвикува нестабилност и високи цени. Домашните потрошувачи се заштитени преку договорени фиксни тарифи, но индустријата, која плаќа пазарни цени, е сериозно погодена, посочува „СЕЕ.биз еу“.

Експертот Матијас Миер од Центарот за енергија, клима и ресурси во Минхен објаснува дека ваквите скокови се најизразени во моменти на ладно време, кога грејните тела дополнително ја зголемуваат потрошувачката. Проценките на Европската комисија предвидуваат зголемување на цените на струјата за 60% до 2030 година, додека постарите преносни мрежи, од кои 40% се постари од 40 години, дополнително ја усложнуваат ситуацијата со ограничен капацитет за издржување на растечката побарувачка.