Skip to content
Според нивните најнови прогнози, економијата годинава ќе забележи пад од 0,2 проценти. Главната причина за ова е трговскиот конфликт, поттикнат од царинската политика на САД, кој сериозно ја погодува германската економија.
Институтот објаснува дека глобалната неизвесност ги одвраќа компаниите од инвестирање, што доведува до намалување на големите набавки, како што се машини и возила. Дополнително, високите оперативни трошоци во Германија ја усложнуваат економската ситуација.
IW нагласува дека германскиот БДП веќе се намалил за 0,2 проценти во 2024 година, и дека земјата ќе продолжи да биде во рецесија и во 2025. Најголем ризик за глобалната економија годинава, според институтот, останува американската трговска политика. Доколку не постоеше царинската политика на САД, глобалната економија би можела да порасне за дополнителни 0,8 проценти во 2025 година.
Перспективите за индустрискиот и градежниот сектор се и понатаму неповолни. Се очекува индустриските компании да остварат уште помала додадена вредност, откако во 2024 година веќе забележаа пад од три проценти. Високите енергетски трошоци, растот на платите и зголемената регулатива дополнително ги оптоваруваат фирмите.
Градежниот сектор, кој во 2024 година забележа пад од 3,7 проценти, и оваа година се соочува со нови ограничувања. Високите трошоци за изградба, предизвикани од регулативата, и понатаму го кочат развојот на секторот.
Институтот исто така предупредува дека овие негативни трендови веќе влијаат врз пазарот на трудот. Бројот на вработени се намалува од средината на 2024 година, а до летото бројот на невработени може да достигне три милиони – бројка која не е забележана од 2010 година.
Михаел Гремлинг, раководител на макроекономските истражувања во IW, смета дека новата германска влада има можност да го прекине овој негативен тренд, особено преку реализација на планираниот посебен фонд за инфраструктура, кој би можел да послужи како стимул за економијата.
